EDITORYAL - Simpleng pagdiriwang sa Pasko ang pairalin

HINIHIMOK ng Malacañang na magkaroon ng simpleng pagdiriwang sa Pasko ang mga tanggapan ng pamahalaan. Iwasan ang mararangya at bonggang selebrasyon. Ang panawagan sa simpleng pagdiriwang ngayong Pasko ay para maihatid ang pakikiramay sa mga nasalanta nang sunud-sunod na bagyo na tumama halos sa iisang lugar—Bicol Region at Northern Luzon. Hindi pa nakakabangon sa bangis ng bagyo ay muling hinagupit.

Ang simpleng pagdiriwang ngayong kapaskuhan ay inihayag ni Executive Sec. Lucas Bersamin sa utos na rin ni President Ferdinand Marcos Jr. Ayon kay Bersamin, nanawagan ang Presidente na alalahanin ang mga biktima nang sunud-sunod na bagyo na tumama sa bansa. Sa direktiba ng Presidente, hinikayat ang mga tanggapan ng pamahalaan na iwasan ang magarbong pagdiriwang ng Pasko. Sa halip na gumastos ang mga tanggapan ay magtipid. Ayon pa kay Marcos ang matitipid ay ipagkaloob o i-donate sa mga biktima ng bagyo. Marami aniya ang nawalan ng bahay at nasira ang mga pananim at kabuhayan.

Marami rin umano ang nagdadalamhati dahil sa mga yumao nilang kaanak. May mga nananatili pa rin sa evacuation centers dahil wala na silang uuwiang bahay dahil nawasak ng bagyo samantalang ang iba ay tinangay ng baha.

Pitong bagyo ang sunud-sunod na tumama sa bansa. Mula nang manalasa ang bagyong Kristine, nagkasunud-sunod ang mga bagyo. Mayroong hindi pa nakakalabas ng bansa ang tumamang bagyo ay may dalawa agad na nakapila. At iisang lugar an tinatahak.

Pagkatapos ng Bagyong Kristine, nananalasa naman ang Bagyong Leon na naghatid ng malaking pinsala sa Bicol Region at Northern Luzon. Sunod na tumama ang Bagyong Marce na nanalasa rin sa nasabing rehiyon. Hindi pa nakakalabas ng bansa ang nanalasang bagyo ay sinundan agad ng Bagyong Nika. Sumunod ang Bagyong Ofel at ang super typhoon Pepito na winasak ang Catanduanes at may mga namatay dahil sa landslides at malawakang pagbaha.

Marami ang wala nang mailuha sapagakat nasaid sa mga tumamang bagyo. Sabi ng mga biktima sa Cagayan, Batanes, Aurora,  Albay, Catanduanes, Camarines Sur at sa mga taga-Calabarzon area particular sa mga bayan sa Batangas, hindi nila alam kung paano magsisimulang muli sapagkat sinira at tinangay ng bagyo ang kanilang kabuhayan. May mga nagsabi na hindi nila alam kung paano ipagdiriwang ang Pasko.

Simpleng pagdiriwang lang ngayong Pasko at ang matitipid ay ipagkaloob sa mga sinalanta ng bagyo. Pangunahan ito ng pamahalaan. Kung maipakikita ang pagiging simple, ito ang tutularan ng mamamayan.