Tropang 5G, E-Painters mitikang sa PBA semifinals
CEBU, Philippines — Ang TNT Tropang 5G ug ang Rain or Shine Elasto Painters mikumpleto sa duha ka duwa nilang pagbihag sa twice-to-beat nilang mga karibal aron pag-abante sa PBA Philippine Cup semifinals niadtong Sabado sa gabii, Hunyo 21, didto sa Ninoy Aquino Stadium sa kaulohan
Si Kelly Williams milansang og duha ka krusyal nga free throws sa katapusang 2.7 segundos aron aswaton ang Tropang 5G ngadto sa kulbahinam nga daog, 80-79, batok sa Magnolia Hotshots sa tinagakay nilang duwa.
"We're lucky Kelly made those two free throws. If it went into overtime I don't know if we could have lasted an extra five minutes," matud pa ni TNT coach Chot Reyes.
Si Williams mitapos uban ang 10 puntos ug 10 ka rebounds.
Sila si Roger Pogoy ug Calvin Oftana mikadlit og 18 puntos matag usa samtang si Brandon Ganuelas-Rosser padayon nga nagparamdam sa iyang presensiya uban ang 12 puntos ug lima ka rebounds. Ang Tropa makigharong sunod batok sa Rain or Shine, nga mipalagpot sa NLEX Road Warriors, 103-92.
Ang San Miguel Beer ug Barangay Ginebra maoy laing pares nga magbangga sa best-of-seven semifinals nga magsugod karong Miyerkules, Hunyo 25, didto sa Mall of Asia Arena sa Pasay City.
Sila si Leonard Santillan, Andrei Caracut, Jhonard Clarito, Anton Asistio ug Mike Malonzo maoy responsable sa balanseng opensiba sa E-Painters nga nakapuhal sa 34 puntos nga eksplosyon ni Robert Bolick sa NLEX.
Si Santillan mitali og 24 puntos ug siyam ka rebounds, si Caracut midugang og 16 puntos, samtang si Clarito mitimbre og 13 puntos uban ang 16 ka rebounds. Dako sab og naambag sila si Asistio ug Malonzo nga nagkumboya'g 21 puntos.
- Latest
