Beermen No.1 seed, Gin Kings sud sa Top 4

CEBU, Philippines — Ang San Miguel Beer mipakaging sa NorthPort Batang Pier, 126-91, niadtong Domingo, Hunyo 15, didto sa Ynares Center sa Antipolo aron pag-angkon sa numero unong puwesto padung sa PBA Philippine Cup playoffs.

Si CJ Perez mipupo og 24 puntos ug lima ka rebounds, sila si Jericho Cruz ug Don Trollano mitali og 17 puntos matag usa, samtang ang Sugbuanong si June Mar Fajardo mitampo og 10 puntos ug 11 ka rebounds alang sa Beermen nga nagtabla uban ang NLEX Road Warriors, Magnolia Hotshots ug Barangay Ginebra Kings human sa eliminasyon bitbit ang managsamang 8-3 rekords.

Apan ang Beermen maoy milugwa nga No.1 seed kortesiya sa mas taas nilang quotient nga gigamit pagbuak sa panagtabla.

Tungod niini, ang Beermen magabaton og twice-to-beat advantage batok sa Meralco Bolts sa quarterfinals nga sugdan dayon karong Miyerkules, Hunyo 18.

Mao sab ang pabor nga kuptan sa Ginebra, nga nakasud sa Top 4 human gilampaso ang Rain or Shine Elasto Painters, 98-80.

Sila si Stephen Holt, Japeth Aguilar ug Jamie Malonzo misidlak uban Gin Kings, nga makigsangka batok sa No.8 Converge FiberXers sa sunod nga hugna sa torneyo.

Si Holt miharos og 27 puntos uban ang 12 ka rebounds, si Aguilar mitimbre og 18 puntos ug 10 ka rebounds, samtang si Malonzo midugang og 15 puntos ug 10 ka rebounds alang sa Gin Kings, nga miabli sa katapusang kuwarter pinaagi sa usa ka masipang 15-0 nga buto aron patikangkangon ang E-Painters.