Pacquiao naglantaw og laing kasaysayan

CEBU, Philippines — Sa dihang si Manny Pacquiao gipahiluna sa International Boxing Hall of Fame tangkod semana na ang milabay, ang Pinoy sports hero mikulit og rekord isip bugtong aktibo nga Hall of Famer.

Laing kasaysayan ang nagpaabot ni Pacquiao sa giatngan niyang pagkatkat og balik sa ring sunod bulan.

Seguradong makahatag kini og dugang motibasyon ni Pacquiao (62-8, 39KOs) sa dihang makigsangka siya batok ni WBC welterweight champion Mario "El Azteca" Barrios (29-2-1, 18KOs) karong Hulyo 19 didto sa MGM Grand sa Las Vegas.

Kon ugaling modaog, si Pacquiao motagik sa iyang pangan sa bato isip labing unang aktibong Hall of Famer nga naghari isip world champion sa susamang higayon.

Sa edad nga 46 anyos, ang kanhi senador sa Pilipinas mosuway sab pagbuak sa kaugalingon niyang marka isip labing tiguwang nga welterweight world titleholder.

Atol sa masilakon niyang propesyonal nga karera nga nagsugod niadtong 1995, si Pacquiao nakabira og 12 ka kalibutanhong korona sa wala ko managlahing dibisyon.

Apan wala na siya maka-away pa sukad gipilde ni Yordenis Ugas sa Cuba alang sa WBA welterweight belt niadtong Agosto 2021.

Migawas gikan sa upat ka tuig nga pagkaretirado, usa kini ka dugang hagit alang ni Pacquiao ilabi na kay mas bata ug mas aktibo ang iyang banggaon nga si Barrios nga manghud niya og 16 ka tuig.