Roach masaligon gihapon ni Pacman

CEBU, Philippines — Edaran naman tuod si Manny Pacquiao apan si Hall of Fame trainer Freddie Roach masaligon gihapon kaayo sa abilidad sa labing banggiitan nga boksidor nga iyang nakuptan.

Ang 46-anyos nga i Pacquiao (62-8-2, 39KOs) mohaw-as gikan sa pagkaretirado aron sangkaon si World Boxing Council (WBC) welterweight champion Mario Barrios (29-2-1, 18KOs) karong Hulyo 19 didto sa Las Vegas.

Gilantaw sa kadaghanan nga ang edad ug ang taud-taud nga pahuway ni Pacquiao maoy mobaraw sa iyang tinguha nga mohimo og impresyon sa pagkatkat niya og balik sa ring.

Kini tungod kay ang banggaon ni Pacquiao mao man ang mas bata, mas aktibo ug mas dako nga si Barrios, nga manghud niya og 16 ka tuig.

Apan bisan paman niining tanan, nagpabiling taas ang kompiyansa ni Roach sa kapasidad ni Pacquiao.

“It's a tough road for anyone at this age to do what Manny is trying to do. But if anyone can do it, Manny can,” dason pa ni Roach sigun sa taho sa Ring Magazine.

Si Pacquiao nagsugod na og bansay-bansay uban ni Roach didto sa Wild Card Gym sa Los Angeles, California diin nahulma ang usa sa labing malampuson nga panag-alyansa sa kasaysayan sa boksing.

Sa dili pa makigbinukbukay ni Barrios, si Pacquiao gitakakda nga ibayaw sa International Boxing Hall of Fame sunod bulan didto sa Canastota, New York.