Pacquiao mibalik sa Wild Card

CEBU, Philippines — Si Manny Pacquiao mitikang og balik didto sa Wild Card Gym sa Los Angeles, California aron mangandam alang sa giatngan niyang pagbalik sa boksing.

Wala na mag-usik pa og oras si Pacquiao gumikan kay nag-training dayon siya uban ni Hall of Fame trainer Freddie Roach nga maoy naghulma kaniya aron mamahimong usa sa labing bangiitan nga mga boksidor sa kasaysayan.

Ang 46-anyos nga si Pacquiao, nga bag-ohay pang napakyas sa iyang kampanya nga makabalik sa Senador, mokatkat og balik sa ring aron sangkaon si World Boxing Council (WBC) welterweight champion Mario Barrios karong Hulyo 19 didto sa Las Vegas.

Mao kini ang unang propesyonal nga away sa bugtong eight-division world champion sukad siya mi-anunsiyo sa iyang pagretiro human gipilde ni Yordenis Ugas sa Cuba pinaagi sa unanimous decision sa ilang WBA welterweight title fight upat ka tuig na ang milabay.

Si Pacquiao nagkupot og 62-8-2 rekord uban ang 39KOs samtang si Barrios, nga manghud niya og 16 ka tuig, nagbitbit og 29-2-1 nga baraha uban ang 18KOs. Edad ug taud-taud nga pahuway ang kontra ni Pacquiao batok sa mas batan-on ug mas aktibo nga si Barrios.

Sa dili pa makigharong ni Barrios, si Pacquiao gikatakda nga ibayaw sa International Boxing Hall of Fame sunod bulan didto sa Canastota, New York.