E-Painters gipatilaw og pilde ang Hotshots
CEBU, Philippines — Gitunolan sa Rain or Shine Elasto Painters ang Magnolia Hotshots sa unang niining pilde, 119-105, sa PBA Philippine Cup didto sa Ynares Center Montalban niadtong Domingo.
Hait kaayo ang tirada sa E-Painters diin ang tanang 12 ka players nga gipasulod ni coach Yeng Guiao naka-igo og tres.
Sila si Jhonard Clarito, Keith Datu ug Beau Belga miposa og tagurha ka 3-pointers alang sa Rain or Shine. Si Adrian Nocum hinoon maoy nangu sa Rain or Shine uban ang 20 puntos.
Ang Sugbuanong si Leonard Santillan miamot og 17 puntos ug 13 ka rebounds alang sa E-Painters nga nakigsawo na karon sa San Miguel Beer sa ikaupat nga puwesto sa standings bitbit ang parehong 4-2 nga baraha.
Sila si Zav Lucero, Ian Sangalang ug Mark Barroca nagkumboya'g 47 puntos apan nakawang ang ilang paningkamot kay napakgang ang unom ka sagunson nga daog sa Hotshots.
- Latest
