Ginebra nagpabilin sa Top 4, Converge 5-3 na

Cebu, Philippines —  Ang Barangay Ginebra mipahugot sa ilang posisyon sud sa Top 4 human gipakaging nila ang Phoenix, 119-112, sa PBA Season 49 Philippine Cup niadtong Biyernes sa gabii didto sa PhilSports Arena sa Pasig City.

Ang Gin Kings milusad og nagkayong 68-45 rally sa tunga-tungang mga kuwarter nga nahimo nilang taytayan ngadto sa una nilang sagunson nga daog ning panapos sa season nga komperensiya.

Tungod niini, ang Ginebra nakigsawo sa sister-team nilang San Miguel Beer sa ikatulo ug ikaupat nga puwesto sa standings uban ang managsamang 4-2 nga baraha.

Samtang ang Fuel Masters natagak sa 2-5 ug nalansang sa ikasiyam nga dapit sunod sa Meralco (3-5).

Sila si RJ Abarrientos ug Japeth Aguilar nagkumbinar og 49 puntos alang sa Gin Kings, samtang si Stephen Holt milansang og upat ka tres sa iyang 18 puntos.

Dako sab og naambag si Scottie Thompson nga mihipos og 17 puntos ug 14 ka assists alang sa kampo ni coach Tim Cone.

Sa laing duwa, si Alec Stockton mipabuhagay og 33 puntos aron pangulohan ang Converge ngadto sa 111-92 nga pagpakaging sa NorthPort.

Ang 26-anyos nga guard mibubo og 13 puntos sa ikaduhang kuwarter sa wala pa midugang og otso puntos sa pinal nga kuwarter aron tabangan ang FinerXers nga makabangon gikan sa miagi nilang 66-85 nga kaparotan sa mga kamot sa Ginebra.

Si Schonny Winston midugang og 22 puntos samtang sila si Justin Arana ug Justine Baltazar parehong mirehistro og double-double alang sa FiberXers nga nagkupot na karon og 5-3 rekord. Si Baltazar mipupo og 10 puntos ug 11 ka rebounds samtang si Arana mitali og 18 puntos ug 14 ka rebounds.