Belano moatubang sa unang hagit isip Wildcats coach sa Tuburan

CEBU, Philippines — Si Felix "Donbel" Belano, Jr. moatubang sa una niyang malisud nga hagit isip head coach sa Cebu Institute of Technology-University (CIT-U) Wildcats sa umaabot nga 1st Mayor Aljun Diamante Inter-Collegiate Basketball Tournament nga gikatakda karong Mayo 24 ngadto sa Hunyo 1 didto sa Tuburan, Cebu.

Ang CIT-U usa sa unom ka Cebu Schools Athletic Foundation, Inc. (CESAFI) teams nga mopakita'g aksiyon ning usa ka semanang torneyo nga nagdalit og kinatibuk-ang P360,000 nga premyo.

Anaa sa Bracket B ang Wildcats kauban ang University of Cebu (UC) Webmasters ug University of San Jose-Recoletos (USJ-R) Jaguars.

Magbugno sa Bracket A ang CESAFI Grand Slam champions University of the Visayas (UV) Green Lancers, University of Southern Philippines Foundation (USPF) Panthers ug Benedicto College (BC) Cheetahs.

Si Belano, nga kaduha nakampiyon atol sa siyam ka tuig niya sa PBA diin siya nakasul-ot sa uniporme sa Sta. Lucia Realtors, Talk 'N Txt Phone Pals ug Barako Bull Energy Boosters dili na bag-o sa pag-coach sa primerong inter-school nga liga sa Sugbo.

Ang garbo sa Tagum, Davao del Norte mogiya sa UV Green Lancers ngadto sa korona sa CESAFI niadtong 2013 atol sa upat ka tuig niyang pagdala sa koponan sa kanhi niya tunghaan gikan sa 2011 ngadto sa 2014.

Karon, ang 48-anyos nga si Belano moabli og bag-ong panid sa iyang karera uban sa Wildcats.

"Akoa ipasalig sa CIT-U community ang new culture and new identity sa team," matud pa ni Belano, nga mihimo og kasaysayan isip bugtong Pinoy nga basketbolista nga mirehistro og quadruple-double sa usa ka duwa sa dihang mikolekta siya og 17 puntos, 11 ka rebounds, 11 ka assists ug 10 ka steals samtang miduwa alang sa Davao Eagles batok sa Nueva Ecija Patriots sa nawagtang nang Metropolitan Basketball Association (MBA) niadtong Agosto 14, 1999 didto sa Araullo Gym sa Cabanatuan City.

"Also, we are teaching the players to become champions inside and outside the court. Emphasizing first the importance of team mentality, then adapting the attitude of cohesiveness and grit every game, valuing hard work by being diligent in practices to get better, and treating each other as a family by showing love and support for one another. Lastly, players must be a role model in their respective communities by showing sportsmanship at all times," dugang pa ni Belano.

Bisan og anaa pa sila sa proseso pagtukod og usab sa ilang team, si Belano mipasalig nga buhaton nila ang tanan kutob sa ilang mahimo aron makapakita og maanindot nga duwa sa Tuburan nga torneyo diin ang manghawod mobulsa og P120,000.

"We will give our best every game. We hope to show our new system and give the people of Tuburan an exciting and entertaining team to watch," dason pa ni Belano, ang 1996 All-Star MVP ug pipila ka higayon nga nakampiyon uban sa Green Lancers sa dihang ang CESAFI nailhan pa nga Cebu Amateur Athletic Association (CAAA) tulo ka dekada na ang milabay.