Pacers mitagak sa Cavs, abante sa NBA East finals

CEBU, Philippines — Ang Indiana Pacers dalaygong mibangon human malubong og 19 puntos sa ikaduhang kuwarter aron patikangkangon sa hingpit ang inilog nga Cleveland Cavaliers uban ang 114-105 nga kadaogan sa Game 5 sa ilang best-of-seven NBA Eastern Conference semifinal series kagahapong adlawa didto sa Rocket Arena sa Cleveland, Ohio.

Si Tyrese Haliburton mikadlit og 31 puntos sa dihang gituldokan sa Pacers ang serye sa baraha nga 4-1 aron pag-abante sa East finals sa ikaduhang sunod-sunod nga tuig.

Dako sab og naambag si Pascal Siakam nga mihipos og 21 puntos ingon man si Andrew Nembhard nga mikimada og 18 puntos.

Wala sab magpabitin si Aaron Nesmith nga mihipos og 13 puntos ug 13 sab ka rebounds alang sa Pacers, nga makigharong sunod batok sa New York Knicks o sa defending champion Boston Celtics.

Sa Western Conference, ang Oklahoma City Thunder mibira og 112-105 nga kadaogan batok sa Denver aron pagposte og 3-2 nga bentaha sa ilang serye.

Bangis kaayo si three-time MVP Nikola Jokic nga miharos og 44 puntos, 15 ka rebounds ug lima ka assits alang sa Nuggets.

Apan nakawang ang impresibo niyang salida gumikan kay ang Thunder nagmangtas sa katapusang kuwarter diin ilang gilabhan ang Nuggets, 34-19, aron silyohan ang krusyal nga daog.   

Si Shai Gilgeous-Alexander, ang karibal ni Jokic pagka-MVP ning season, mipupo og 31 puntos aron pangulohan ang Pacers.