Mavs midaog sa NBA Draft lottery

CEBU, Philippines — Ang Dallas Mavericks maoy midaog sa NBA Draft lottery nga gipahigayon didto sa Chicago kagahapong adlawa.

Tungod niini, naangkon sa Mavs ang katungod nga mokuha sa No.1 overall pick sa 2025 NBA Draft nga gikatakda karong Hulyo 25-26 didto sa Barclays Center sa Brooklyn, New York.

Usa kini ka bulawanong oportunidad alang sa Mavs aron tukoron og balik ang ilang koponan nga nahugno human ilang gi-trade ang superstar nilang si Luka Doncic ngadto sa Los Angeles Lakers niadtong Pebrero.

Ning sayo pa, gisaytan dayon sa Mavs ang college prospect nga si Cooper Flagg. Ang 18-anyos nga si Flagg maoy paborito aron pilion nga top pick sa 2025 Draft.

Ang 6'9" nga big man mideklara nga moapil sa draft sa miaging bulan human nakaduwa og usa ka season sa college basketball uban sa Duke University diin siya gipasidunggan nga National Player of the Year.

Si Flagg mi-average og 19.2 puntos, 7.5 rebounds, ug 4.2 assists matag duwa. Gilantaw siya sa kadaghanan nga usa ka talagsaon nga talento.

Sa kinatibuk-an, 14 ka teams ang miapil sa draft lottery. Ang San Antonio Spurs maoy mobira sa No.2 pick ug pagasundan kini sa Philadelphia 76ers, Charlotte Hornets, ug Utah Jazz.