Magnolia, NLEX buot inaton ang mainit nilang ratsada

CEBU, Philippines — Ang Magnolia Hotshots ug ang NLEX Road Warriors naglaraw nga inaton ang mainit ilang ratsada sa dihang makigharong sila batok sa managlahing kontra sa PBA Philippine Cup karong adlawa (Miyerkules, Mayo 14) didto sa Ninoy Aquino Stadium sa kaulohan.

Gikan sa usa ka semanang pahuway, ang Hotshots motikang og balik sa korte aron sangkaon ang Meralco Bolts sa main game nga gikatakda sa alas 7:30 sa gabii. Ang Hotshots, ang bugtong koponan nga way pilde ning panapos sa season nga komperensiya, naglaraw nga bitaron ang perpekto nilang rekord ngadto sa 6-0.

Gipayaka nila ang Blackwater, Converge, San Miguel Beer, Phoenix Super LPG ug Terrafirma sa miagi nilang mga duwa.

Tungod niini, nag-una karon ang Hotshots sa karera alang sa Top 4 nga dunay twice-to-beat advantage sa quarterfinals.

Samtang ang Bolts padayong nanikaysikay kay tulo pa ang daog nga giatbangan og upat ka pilde. Sa pasiunang duwa sa alas-5 sa hapon, ang NLEX Road Warriors nagtinguha nga inaton ang sagunson nilang daog ngadto sa lima ka duwa sa dihang ilang bugnoon ang Terrafirma Dyip.

Ang NLEX nagkupot karon og 4-1 nga baraha samtang ang Terrafirma usa pa ang daog sud sa unom ka duwa.