TNT padayong nanginit, SMB namawi
CEBU, Philippines — Ang TNT Tropang 5G miinat sa mainit nilang ratsada uban ang 101-84 nga paglampornas sa Meralco Bolts sa PBA Philippine Cup didto sa Ninoy Aquino Stadium niadtong Dominggo sa gabii.
Hait kaayo ang tirada sa Tropang 5G nga milansang og 16 ka 3-pointers kumpara sa tulo lamang ka tres sa Bolts tibuok duwa.
Sila si RR Pogoy ug Calvin Oftana maoy nangu sa eksplosibong opensa sa TNT uban ang lima ka tres matag usa.
Sila si Glenn Khobuntin ug Kelly Williams naka-igo og tagurha ka 3-pointers samtang sila si Simon Enciso ug Rey Nambatac midugang og tagsa ka tres.
Si Pogoy mipabuto og 34 puntos, si Oftana mi-iskor og 28 samtang sila si Nambatac ug Poy Erram nagkumboya'g 23 puntos alang sa Tropang Giga, nga mikadlit sa ikatulo nilang sagunson nga daog hinungdan nga nakasud na sila sa Top 8 sa standings bitbit ang 3-3 nga baraha.
Sa laing duwa, si Don Trollano mibubo og 10 sa iyang 21 puntos sa ikaduhang kuwarter aron ituboy ang San Miguel Beer ngadto sa 111-92 nga demolisyon sa Phoenix.
Tungod sa pagpanginit ni Trollano, ang Beermen nakabuhi gikan sa sikit nga kumbati aron pagposte og 64-46 nga labaw.
Misalida sab dayon sila si CJ Perez, June Mar Fajardo ug uban pang starters sa SMB aron paburoton ang ilang bentaha ngadto sa 24 puntos, 89-65, nga miresulta sa impresibo nilang pagbangon gikan sa miagi nilang 97-107 nga kaparotan sa mga kamot sda TNT.
Si Perez mikadlit og 26 puntos samtang si Fajardo mirehistro sa ikaunom niyang sunod-sunod nga double-double uban ang 20 puntos ug 12 ka rebounds alang sa Beermen, nga nagtangag na karon og 4-2 rekord.
- Latest
