Celtics bangis nga miresbak sa Knicks, Wolves 2-1 na
CEBU, Philippines — Nahisukamod sa nag-unang duha ka duwa sa serye bisa'g miabante sila og 20 puntos sa matag higayon, wala na itugot pa sa defending champion Boston Celtics nga pakauwawan sila sa karibal nilang New York Knicks ning higayona.
Gamit ang balanseng opensa, ang Celtics miposte og krusyal nga daog sa dalan human gidominar nila ang Knicks, 115-93, sa Game 3 sa ilang best-of-seven NBA Eastern Conference semifinal series kagahapong adlawa didto sa Madison Square Garden sa New York City.
Si Payton Pritchard, ang 2025 NBA Sixth Man of the Year, milansang og lima ka 3-pointers aron pangulohan ang Celtics bitbit ang 23 puntos.
Wala sab magpabitin si Jayson Tatum nga midugang og 22 puntos, siyam ka rebounds ug pito ka assists alang sa Celtics nga miputol sa ilang alkansi sa serye ngadto na lang sa 2-1. Puyde silang makatabla kon ugaling usban nilang og parot ang Knicks sa Game 4 karong Martes.
Sila si Jaylen Brown ug Derrick White nagkumboya'g 36 puntos alang sa Celtics, nga milayat ngadto sa 36-20 nga labaw human sa unang kuwarter nga ilang giinat ngadto sa 71-46 sa halftime.
Nakasustinir sa ilang kainit ang Celtics nga nagkupot og 96-70 bentaha padung sa pinal nga kuwarter. Wala na nila paginhawaa pa sukad niadto ang Knicks.
Si Jalen Brunson mirehistro og 27 puntos samtang si Karl-Anthony Towns mihipos og 21 puntos ug 15 ka rebounds alang sa Knicks nga wala maabot sa conference finals sukad niadtong 2000.
Sa West, si Anthony Edwards mipabuto og 36 puntos samtang si Julius Randle mikolekta og triple-double nga 24 puntos, 12 ka assists ug 10 ka rebounds sa dihang giusban og parot sa Minnesota Timberwolves ang Golden State Warriors, 102-97, aron pagposte og 2-1 nga bentaha sa ilang serye.
- Latest
