Ginebra miwani sa Converge

CEBU, Philippines — Ang Barangay Ginebra Kings mipayaka sa Converge FiberXers, 85-66, sa ilang out-of-town game sa PBA Philippine Cup niadtong Sabado sa gabii didto sa Bren Guiao Convention Center sa San Fernando, Pampanga.

Si Japeth Aguilar mipakita og maanindot nga salida atubangan sa iyang mga 'cabalen' kon katagilungsod aron pangulohan ang Kings uban 23 puntos. Sila si Scottie Thompson, RJ Abarrientos ug Stephen Holt mikadlit og dili mominus 12 puntos matag usa alang sa Kings, nga miinat sa ilang rekord ngadto sa 3-2.

Samtang namawi sa miagi nilang kaparotan, ang Kings mipakgang sab sa tulo ka sagunson nga daog sa FiberXers.

Kontrolado kaayo sa Ginebra ang dagan sa duwa sukad sila misutoy sa sayong 23-13 nga labaw nga ilang pang gipaburot ngadto sa 16 puntos, 50-34, sa halftime.

Wala na makabangon pa sukad niadto ang FiberXers.

Ang kababayan ni Aguilar nga si Justine Baltazar miposte og double-double nga 13 puntos ug 10 ka rebounds apan nakawang ang iyang paningkamot kay ang FiberXers nakatilaw sa ikatulo niining pilde sud sa pito ka duwa.