Away nilang Pacquiao ug Barrios kasado na magsangka alang sa WBC welterweight title karong Hulyo 19

CEBU, Philippines — Si Pinoy ring star Manny Pacquiao motapos sa upat ka tuig niyang pagretiro sa edad nga 46 anyos aron sangkaon si WBC welterweight champion Mario Barrios.

Sigun pa sa taho sa ESPN kagahapong adlawa nga ang away ipahigayon didto sa Las Vegas karong Hulyo 19.

Si Pacquiao, nga nakadaog og usa ka dosenang world titles sa walo ka managlahing dibisyon, wala na maka-away pa sukad siya gipilde ni Yordenis Ugas sa Cuba pinaagi sa unanimous decision sa 12 ka hugna nilang bugno alang sa WBA welterweight belt niadtong Agosto 21, 2021 didto sa Las Vegas.

Sa miaging semana, si WBC president Mauricio Sulaiman mibutyag nang daan sa usa ka promosyon didto sa Saudi Arabia nga si Pacquiao nagplano nga mohagit ni Barrios alang sa korona niini sa Hulyo ug gitugotan na kini nga mo-away sa Nevada State Athletic Commission.

Ang mga lagda sa WBC nagtugot sa kanhi kampiyon nga mohangyo og usa ka world title fight kon ugaling mogawas kini gikan sa pagkaretirado.

Si Pacquiao gikatakda nga ibayaw sa International Boxing Hall of Fame sunod bulan ug nagpapili og balik pagka-Senador sa Pilipinas sa eleksiyon sunod semana.

Ang bugtong eight-division world champion sa kasaysayan nagkupot og 62-8-2 win-loss-draw record uban ang 39KOs samtang si Barrios nagtangag og 29-2-1 nga baraha uban ang 18KOs.