Karong hapon sa SM Seaside mga bitoon sa Cebu sports mosidlak sa SAC Awards

CEBU, Philippines — Ang nag-unang mga personalidad ug labing hayag nga bitoon sa Cebu sports maoy mansentro sa atensiyon sa 39th Sportswriters Association of Cebu-San Miguel Beer (SAC-SMB) Cebu Sports Awards sugod sa alas-3 sa hapon karong adlawa (Sabado, Abril 26) diha sa Cube Wing sa SM Seaside City.

Ipahigayon matag tuig, ang prestihiyosong kalihukan nagselebrar sa pagkamaayo sa mga Sugbuanon sa natad sa paugnat sa kusog pinaagi sa paghatag og rekognasyon sa mga atleta, coaches ug teams sa dalaygong nilang nakab-ot sa  lokal ug internasyonal nga bantawan.

Si Jessica Jawad-Honoridez, ang athletic director sa University of Cebu (UC) nga nagsilbe sab nga  Cebu City Sports Commissioner, maoy tunolan sa Rico Navarro Trophy isip “Sportsman of the Year”.

Siya maoy labing unang babaye nga hatagan sa maong pasidungog sud sa dul-an upat ka dekada nga kasaysayan sa SAC.

Sila si boxing trainer Edito Villamor, basketball patron Dee J P. Villanueva, ug ang Carcar City Floorball Association makadawat og ORLACSAN Awards tungod sa ilang adbokasiya sa grassroots sports.

Pasidunggan sab ang usa ka pundok sa bangiitang mga atleta sama nilang eight-time PBA MVP June Mar Fajardo, World 9-ball champion Rubilen Amit ug World Boxing Council (WBC) minimumweight champion Melvin Jerusalem.

Duyogan sila nilang Olympians Elreen Ando, John Febuar Ceniza ug Kiyomi Watanabe; gymnastics coach Allen Aldrin Castaneda; ug mga beteranong weightlifting coach nga sila si Ramon Solis ug Christopher Bureros.

Ang ubang mga major awardees naglangkob nilang weightlifters Fernando Agad, Althea Bacaro, ug Eron Borres; volleyball stars Sisi Rondina ug Thea Gagate; amputee triathlete Alex Silverio; jiu-jitsu world champions Ellise Xoe ug Eliecha Zoe Malilay; golfer Grace Quintanilla; chess sensdation Apple Rubin; SEA Games Vovinam gold medalist Janah Jade Ochea; skateboarding icon Margielyn Didal; elite cyclists Jonel Carcueva ug Shagne Yaoyao, ug ang all-female Esports world champion Smart Omega Empress team.

Ipresenta sab ang special citations ngadto sa mga teams ug atleta gikan sa Palarong Pambansa, PBA, CESAFI ug uban pang nasudnong torneyo agi'g pagyukbo sa pagsabwag nila og dungog ug garbo sa mga Sugbuanon.