Thunder milusad og makapakurat nga pag-eskapo, 3-0 na batok Grizzlies

CEBU, Philippines — Ang Oklahoma City Thunder mihimo og makapakurat nga pagbangon human malubong og 29 puntos aron pakagingon ang Memphis Grizzlies, 114-108, ug pagposte og 3-0 nga bentaha sa ilang best-of-seven NBA Western Conference first-round playoff series kagahapong adlawa didto sa FedEx Forum sa Memphis, Tennessee.

Gipahimuslan og maayo sa Thunder ang pagkawala ni Memphis star guard Ja Morant nga wala na makatiwas og duwa human na-angol ang hawak sa naghinapos nga bahin sa ikaduhang kuwarter.

Ang Grizzlies miposte sa labing dako nilang bentaha sa iskor nga 69-40 pipila lamang ka segundos sa wala pa mibiya si Morant sa nahibilin nga 3:15 sa first half.

Dako gihapon ang ilang labaw sa halftime, 77-51, apan gikulata sila sa nagmangtas nga Thunder sa pinal nga duha ka kuwarter, 63-31.

Si Shai Gilgeous-Alexander mitagak og 31 puntos, si Jalen Williams mi-iskor og 26 samtang si Chet Holmgren mibubo og 23 sa iyang 24 puntos sa second half aron ituboy ang Thunder ngadto sa ikaduhang labing dako nga pagbalitok sa NBA playoffs sukad niadtong 1997.

Ang bugtong mas dako nga pagkolapso sa NBA playoffs sa miaging 25 ka tuig nahitabo niadtong 2019 sa dihang ang Los Angeles Clippers nakabawi human nabiyaan og 31 puntos aron patikalbongon ang Golden State Warriors.

Sa makapakugang nilang pag-eskapo, ang Thunder nanginahanglan og usa na lang ka daog aron moabante sa ikaduhang hugna sa playoffs. Duna silay tsansa nga i-sweep ang serye sa Game 4 karong Dominggo didto gihapon sa korte sa Grizzlies.

Sa ubang mga resulta, ang New York Knicks mitumba sa Detroit Pistons, 118-116, samtang ang Los Angeles Clippers milampornas sa Denver Nuggets, 117-83.

Sila si Karl-Anthony Towns ug Jalen Brunson nagkumbinar og 61 puntos aron pangulohan ang Knicks ngadto sa 2-1 nga bentaha sa serye. Ang Clippers 2-1 na sab batok sa Nuggets, salamat nilang Kawhi Leonard, James Harden ug Norman Powell nga nagkumboya'g 61 puntos.