SAC mopasidungog ni Honoridez isip "Sportsman of the Year"

CEBU, Philippines — Sa labing unang higayon, ang Sportswriters Association of Cebu (SAC) motunol sa ilang pinakataas nga paghatag og pasidungog sa usa ka kaliwat ni Eba — ug kini walay lain kondili si Jessica "Jiji" Jawad-Honoridez.

Ang bantogan ug tinahod nga coach, sports official ug organizer, si Honoridez maoy gipiling "Sportsman of the Year" sa gikatintapang 39th SAC-San Miguel Beer All-Cebu Sports Awards nga mahitabo karong Abril 26 sa Cube Wing of SM Seaside City. Dili tiaw ang kaagi ni Honoridez aron siya mailhan tungod kay nahulma kini gikan sa iyang mga kalamposan ug kapakyasan.

Isip kanhi table tennis player, damgo niyang makauban sa national team ang iyang nitaliwang igsuon nga si Erne Jawad.

Apan dunay trahedyang nahitabo sa iyang igsuon kay kini gidunggab ug namatay samtang nangandam kini sa usa ka event nga gi-organisar, ang maong subo nga panghitabo maoy nakapausab sa kinabuhi ni Jessica.

Agi og paghandum sa iyang igsuon, nag-organisar og torneyo si Jessica, ang Erne Jawad Cup. Gamay kaayo kini kaniadto apan usa na karon sa pinakadugay nga table tennis events sa nasud nga karon nakapahigayon na og torneyo sud sa 33 ka tuig.

Bisan pa man sa mga babag ug kalisdanan ug limitadong pundo, napadako kini ni Jessica pinaagi sab sa suporta sa iyang pamilya ug tabang sa ubang tawo.

Ang iyang propesyonalismo ug patas nga pagtagad sa tanan, bisan iyaha pa ang players ang nag-officiate sa mga torneyo, nagsilbi kining tamdanan nga maoy rason nganong nilungtad ang maong torneyo. Gawas sa iyang trabaho sa Jawad Cup, daghang gidumala ug gimugnang mga events si Honoridez , nag-train og mga disiplinadong mga atleta nga nailhan na karon sa nasud. Samtang estrikto siya panahon sa trainings ug kompetisyon, susama siya og usa ka inahan o igsuon sa gawas sa sporting arena.

Ang iyang dedikasyon dili masukod basi lang sa mga tropeyo o medalya, kay mao kini nagtuboy kaniya nga nakapahimo kaniyang University of Cebu athletic director ug dayun commissioner sa Cebu City Sports Commission.

Iyang gihatagan og pagtagad kung unsay maayo para sa mga atleta ug kun unsay magpalambo kanila kay para niya importante gyud nga moeskuyla ang mga atleta aron duna silay magamit kun mahunong na ilang karera sa pagka-varsity sa mga eskuylahan. Hinuon, giangkon ni Honoridez nga dili niya mabuhat kining tanan kung wala pa siya suportahi sa tagiya sa UC nga si Atty. Agusto Go ug anak sa naulahi nga si UC President Candice Gotianuy.

Matud pang Honoridez kining walay paglubad nga suporta sa managamahang Go sa ilang sports programs, maoy hinungdan nganong naka-prodyus sila og Olympian pinaagi sa mga weightlifters nga silang Elreen Ann Ando ug Febuar Ceniza.

Kay si Honoridez mibarog gyud nga kinahanglang ipadayun ang weightlifting program sa UC bisan og gamay ra ang mga kompetisyon niini dinhi. Lawom na kaayo ang impluwensiya ni Honoridez sports community kay nailhan siyang masandigan sa panahon sa kalisdanan kay andam siyang mopaambit.

“You sportswriters keep us going! Whether in victory or adversity, your stories solve problems and motivate coaches and athletes to strive for the best results,” matud pang. — /Pooled report/ IBM