Clippers, Wolves mibira og luna sa NBA playoffs

CEBU, Philippines — Si James Harden mi-iskor og 39 puntos sa dihang gibuntog sa Los Angeles Clippers ang Golden State Warriors, 124-119, sud sa overtime aron langkaton ang katapusang awtomatik nga luna sa playoffs sa kulbahinam nga pagtak-op sa NBA regular season kagahapong adlawa.

Luyo sa pagmangtas sa 35-anyos nga si Harden didto sa San Francisco, ang Clippers miangkon sa ikalimang puwesto sa Western Conference diin ilang makasangka ang No.4 seed Denver Nuggets sa unang hugna sa playoffs.

Apil sa nakabkab nga puntos ni Harden mao ang duha ka sagunson nga 3-pointers sa overtime nga nakasalbat sa Clippers sa sikit kaayong duwa diin nagusab-usab ang labaw sud sa 23 ka higayon.

Mihimo sab og kasikas si Kawhi Leonard uban ang 33 puntos ingon man si Ivica Zubac nga mitali og 22 puntos alang sa ikawalong sunod-sunod nga daog sa Clippers.

Si Stephen Curry miharos og 36 puntos samtang si Jimmy Butler midugang og 30 puntos alang sa Warriors, nga duna pay tsansa nga maka-abante sa sunod nga hugna sa torneyo apan mag-agi usa sila og play-in batok sa Memphis Grizzlies karong Miyerkules.

Sa laing bahin, ang Denver misilyo sa 4th seed sa West human miposte og 126-111 nga kadaogan batok sa second-seeded Houston Rockets.

Kontrolado kaayo sa Nuggets ang duwa diin sa usa ka higayon naglabaw sila og 36 puntos sa katapusang kuwarter.

Si Nikola Jokic,  nga bag-ohay pang mihimo og kasaysayan isip ikatulo pa lamang nga NBA player   nga mi-average og triple double sa tibuok season sunod nilang Oscar Robertson ug Russell Westbrook, mihipos og 18 puntos, pito ka rebounds, ug pito ka assists.

Samtang ang Minnesota Timberwolves mibira sa ikaunom nga puwesto sa West nga nakapaderetso kanila sa playoffs human gibugha ang Utah Jazz, 116-105.

Malisud hinoon nga tahas ang sagubangon sunod sa Wolves gumikan kay ang LA Lakers nilang LeBron James ug Luka Doncic mao man ang ilang makaharong sa playoffs.