TNT, Ginebra magkumbati na sa PBA Finals

CEBU, Philippines — Sugdan na sa TNT Tropang Giga ni coach Chot Reyes ug ang Barangay Ginebra Kings ni coach Tim Cone ang ilang best-of-seven finals series alang sa korona sa PBA Season 49 Commissioner's Cup karong adlawa (Biyernes, Marso 14) didto sa Mall of Asia Arena sa Pasay City.

Mag-abot sila sa alas 7:30 sa gabii.

Samtang ang mga imports nga sila si Rondae Hollis-Jefferson sa TNT ug Justin Brownlee sa Ginebra ang tataw nga masentro sa atensiyon, ang lokal nga mga players nagkupot og mahinungdanong papel ning serye.

Apan tungod kay wala ang injured nilang top guard nga si Jayson Castro, ang Finals MVP sa dihang gipatikangkang sa TNT ang Ginebra sud sa unom ka duwa aron paglugwa nga kampiyon sa Governor's Cup niadtong Nobiembre sa miaging tuig, si Reyes miangkon nga ang Tropang Giga magsagubang og malisud nga tahas batok sa nagkalig-on nga Kings.

"Jayson is much more than just the skills he brings to the table. It's a lot of other things - leadership, maturity, reading the game. So in a finals, those are very, very important. Those are critical elements," dason pa ni Reyes. "Our ability to play at a high level without Jayson will be key."

Alang ni Reyes, walay makahulip sa dapit ni Castro apan ang back-up guard nilang si Rey Nambatac andam nga mogakos ning maong hagit.

"Nabigla rin ako sa nangyari sa pagka-injury ni kuya Jayson. Na-pressure din ako," padayag pa ni Nambatac. "At least kahit paano na-overcome ko na 'yung pressure na 'yun and na-realize ko na instead na bumaba yung morale ko, tinake ko siya as motivation and a positive (thing) na rin para lumabas yung laro ko and makatulong pa rin sa team namin."

Sa habig sa Ginebra, si Stephen Holt masaligon kaayo sa ilang tsansa batok sa Tropang Giga ning higayona.

"It's a big blessing: Two conferences, two finals appearances, definitely won't take these moments for granted. It's all due to our hard work individually and as a group, as a team," matud pa ni Holt, nga naglaraw sa una niyang titulo sa PBA sama sa mga teammates niyang sila si Maverick Ahanmisi ug RJ Abarrientos.

"And, obviously, we're very confident. We like our chances and this is why we compete. Two great teams, two great coaches and a lot of great players. So, let's just roll the dice and see what happens."

Nakadugang sa kadasig sa Ginebra mao ang pagbalik ni Jamie Malonzo gikan sa calf injury ug ang pagkabalik sa maayong kondisyon ni Jeremiah Gray human gihamok og mga isyu sa iyang tuhod. Ug anaa pa si Troy Rosario, nga gilantaw ni Reyes nga usa ka dakong tunok sa dalan sa Tropang Giga bisan og miduwa kini sa una pa lamang niyang komperensiya uban sa Kings ning season.

"He wasn't there in our last final, so that's going to be a big factor," kanayon pa ni Reyes.