Thunder miangkon og luna sa NBA playoffs

CEBU, Philippines — Si Shai Gilgeous-Alexander mipabuto og 34 puntos sa dihang ang Oklahoma City Thunder miangkon og luna sa NBA playoffs human miposte og impresibong 118-112 nga kadaogan batok sa defending champion Boston Celtics kagahapong adlawa didto sa TD Garden sa Boston, Massachusetts.

Mangtas kaayo si Gilgeous-Alexander nga mipasud og 11 sa 20 niya ka itsa ug kausa lamang masipyat sa 11 niya ka free throws.

Ang Canadian star guard milangkat sab og lima ka rebounds ug pito ka assists alang sa Thunder, nga padayong naghari sa Western Conference bitbit ang 54-12 rekord nga naghatag kanila og awtomatik nga puwesto sa sunod nga hugna sa torneyo.

Gawas ni Gilgeous-Alexander, mikuha sab og atensiyon si Chet Holmgren uban ang double-double nga 23 puntos ug 15 ka rebounds.

Ug bisan wala si Jaylin Williams sa ilang lineup, pito gihapon ka Thunder ang mirehistro og double figures.

Si Jayson Tatum maoy nangu sa Celtics uban ang 33 puntos samtang si Derrick White mihipos og 22 puntos.

Apan si Jaylen Brown namugnaw ug naka-igo lamang og lima sa 15 niya ka tira.

Sa laing bahin, nagkahanap ang tsansa sa Phoenix Suns nga makasud sa play-in human sila gipayaka sa Houston Rockets,111-104.

Ang Suns ika-11 karon sa West uban ang 30-36 nga baraham samtang ang Dallas Mavericks ika-10 bitbit ang 33-34 nga marka.

Ang Memphis Grizzlies ikatulo sa West uban ang 42-24 rekord human gipaksit ang Utah Jazz, 122-115.