Doncic mibirada batok sa kanhi team
CEBU, Philippines — Si Luka Doncic miatubang sa kanhi niya team nga Dallas Mavericks sa labing unang higayon sukad sa makapakurat niyang pagbalhin sa Los Angeles Lakers ug mirehistro siya og triple-double sa 107-99 milang kadaogan.
Ang five-time All-Star gikan sa Slovenia naabot sa Lakers hulip ni Anthony Davis sa usa ka trade nga nakatay-og sa NBA ug nakapalagot og maayo sa mga fans sa Mavs. Ang injured nga si Davis mipatim-aw didto sa Crypto.com Arena sa LA ug gihatagan og pasidungog sa Lakers atol sa una nilang timeout.
Mainiton sab nga gidawat sa mga dumadapig sa Lakers si Mavs general manager Nico Harrison pinaagi sa pagsiyagit og "Thank you Nico" sa higayon nga moitsa og free throws sa Doncic. Wala pakyasa ni Doncic ang ilang fans pinaagi sa pagkadlit og 19 puntos, 15 ka rebounds ug 12 ka assists.
Wala hinoon makuntento si Doncic sa iyang performance ilabi na kay nanginahanglan pa sila og tabang ni LeBron James sa pinal nga 12 minutos sa aksiyon aron tumbahon ang Mavs.
Si James mibubo og 16 sa iyang 27 puntos sa katapusang kuwarter aron agakon ang Lakers.
Si Kyrie Irving mipaulbo og 35 puntos uban ang pito ka rebounds ug upat ka assists samtang si Klay Thompson mihipos og 22 puntos sa pilderong Mavs.
- Latest
