Doncic nagmangtas, mibida sa Lakers batok Nuggets

CEBU, Philippines — Si Luka Doncic mipaulbo og 32 puntos sa dihang gipakgang sa Los Angeles Lakers ang siyam ka sagunson nga daog sa Denver Nuggets, 123-100, sa NBA kagahapong adlawa didto sa Ball Arena sa Denver, Colorado.

Gawas sa eksplosibo niyang opensa, ang Slovenian All-Star guard midugang sab og 10 ka rebounds ug pito ka assists alang sa Lakers, nga nagpabilin sa ikalimang dapit sa Western Conference bitbit ang 34-21 nga baraha.

Wala sab magpabitin ang alas sa Lakers nga si LeBron James nga mitimbre og 25 puntos ingon man sila si

Austin Reaves ug Rui Hachimura nga nagkumbinar og 44 puntos.

Luyo sa sayong pagmangtas ni Doncic, ang Lakers misutoy ngadto sa sayong 31-18 nga labaw. Wala na sila molingi pa sukad niadto.

Hingpit nga gipabarag sa Lakers ang Nuggets uban ang 117-97 nga bentaha sa pinal nga kuwatro minutos.

Ang Nuggets anaa pa hinoon gihapon sa ikatulong puwesto sa West bitbit ang 37-20 nga baraha.

Sa laing aksiyon, ang Phoenix Suns miputol sa upat ka sunod-sunod nilang malas human gibalian og sungay ang Chicago Bulls, 121-117.

Si Kevin Booker mikadlit og 29 puntos samtang sila si Kevin Durant ug Bradley Beal nagkumboya'g 52 puntos alang sa Suns nga madasigong mibangon human mabiyai og 13 puntos sa sayong bahin sa duwa aron inaton ang ilang marka ngadto sa 27-29.

Ang Australyanong si Josh Giddey mikolekta og 24 puntos apan wala mosaler ang maanindot niyang salida sa habig sa Bulls.

Didto sa Philadelphia, nagpadayon ang kalbaryo sa 76ers nga nakatilaw sa ikapito nilang sagunson nga pilde human gipayaka sa Brooklyn Nets, 105-103.

Nakatabla unta ang Sixers sa iskor nga 103-103 human sa tres ni Tyrese Maxey sa nahibiling 23 segundos.

Apan si Nic Claxton mipasud sa iyang layup dayong kapupos sa oras aron aswaton ang Nets ngadto sa makapaisa'g balahibo nga kadaogan.

Si Cameron Johnson ang bida sa Nets uban ang 23 puntos.

Samtang ang 31 puntos ni Maxey nakawang alang sa Sixers.

Namugnaw na sab ang bitoon sa Sixers nga si Joel Embiid, nga mipuntos lamang og 14 kay upat ray na-igo sa 13 niini ka tira sa wala pa gipalingkod sa katapusang kuwarter.