Gisaytan sa OX KBDF gaming mas dako ug mas bongga nga "binukbukay sa sugbo"

CEBU, Philippines — Nadasig sa kalamposan sa labing una niyang pag-asdang sa eksena sa boksing, si OX KBDF Gaming big boss Dr. Winley de la Fuente naglantaw sa unahan sa mas dako ug mas bongga nga pasundayag walo ka bulan gikan karon.

Ang buena manong "Binukbukay sa Sugbo" nga promosyon ni De la Fuente niadtong Pebrero 8 didto sa Nustar Resort and Casino Convention Center nahaum gyud sa pangan niini.

Nasentro sa aksiyon ang dugoon ug brutal nga gubat tali sa Koreanong kampiyon nga si Jong Seon Kang ug Hapon nga si Ryoto Owan.

Sa huego todo nilang kumbati, sila si Kang ug Owan way puas nga milabay sa labing nindot nga mga suntok nga nasaksihan sa mga fans nga nalingaw og maayo sa eksplosibong engkwentro.

Ang duha ka maisog nga mga boksidor nagbinayloay og tumba sa wala pa si Owan mibirada og makusog nga mga kumo ngadto sa ulo ni Kang nga wala na mibawos ug sukmag kay klarong nalipong hinungdan nga giundang ni Thai referee Surat Soikrachangang away sa nahibilin nga usa ka segundo sa ikasiyam nga hugna.

Sa wala pa kini, ang Sugbuanong si Rodex "The Tank" Piala mipakita og tumang kaisog ug determinasyon dayon na ngadto sa pagpayalas sa Tsinoy nga si Yeerjialahasi Laayibieke sa trono niini aron langkaton ang WBO Oriental super featherweight belt.

Sa iyang kalipay sa maanindot nga performance ni Piala, gihatagan ni De la Fuente ang pambato sa ARQ Stable og P100,000 nga bonus.

Miangkon hinoon si De la Fuente nga dili perpekto ang inisyal niyang paukyab sa paugnat sa kusog.

"We assessed the event and saw that it wasn’t perfect. There were lapses in production though only minor ones. Rest assured we will work on this to make some improvement in our next promotions," paambit pa ni De la Fuente. "Overall, I am grateful to my crew and staff for putting together a great event."

Si De la Fuente misaad nga dad-on ang iyang pasundayag sa mas nindot nga ang-ang alang sa ikaduha niining edisyon karong Oktubre."We're now planning for October, and it has to be bigger and better," padayon pa ni De la Fuente. "A world title fight would be ideal. I’ve already started scouting boxers who could fight for either an IBF or WBO title. We’re looking at having two championship fights possibly both world title bouts."