NorthPort, TNT abante sa PBA semifinals

CEBU, Philippines — Ang NorthPort Batang Pier ug ang TNT Tropang Giga miangkon og luna sa PBA Commissioner's Cup semifinals human gipalagpot ang tagsa-tagsa nila ka mga karibal niadtong Huybes sa gabii didto sa Ninoy Aquino Stadium sa kaulohan.

Ang NorthPort migamit sa hugot nilang depensa aron paandaron ang ilang opensa nga miresulta ngadto sa 113-110 nilang pagpiog sa Magnolia Hotshots.

Nahimong taytayan sa Batang Pier ngadto sa kadaogan ang eksplosibo nilang ataki sa ikatulong kuwarter diin ilang gilabhan ang Hotshots, 36-15.

Si Kadeem Jack miharos og 30 puntos uban ang 10 ka rebounds, lima ka steals ug tulo ka blocks, si Arvin Tolentino mitali og 25 puntos samtang si William Navarro midugang og 15 puntos alang sa NorthPort, nga makigharong batok sa Barangay Ginebra Kings o Meralco Bolts sa best-of-seven semis.

Sa laing bahin, ang TNT mitikang sa Final Four human gibugha ang Eastern Hong Kong, 109-93.

Si Rondae Hollis-Jefferson maoy nangu sa balanseng opensiba sa TNT bitbit ang 31 puntos ug 15 ka rebounds.

Si Rey Nambatac mi-iskor og 18, sila si Poy Erram ug Jason Castro nagkumbinar og 31 puntos samtang si Calvin Oftana miamot og 12 puntos alang sa Tropang Giga, nga makigsangka sa Converge FiberXers o sa Rain or Shine Elasto Painters sa semis.