Cavs milampornas sa Mavs

CEBU, Philippines — Ang Dallas Mavericks, nga nakugang sa kalit nga pag-trade sa alas nilang si Luka Doncic ug gihamok pa gyud og mga injury, gilampaso sa Cleveland Cavaliers, 144-101, sa ilang sangka sa NBA kagahapondidto sa Rocket Mortgage Fieldhouse sa Cleveland, Ohio.

Hayag na kaayo ang resulta sa duwa sa unang kuwarter pa lamang human gilat-an dayon sa Cavs ang Mavs, 50-19.

Bangis kaayo ang Cavs nga milansang og franchise-record nga 26 ka 3-pointers ug sa usa ka higayon naglabaw og 53 puntos.

Si Sam Merrill miposa og siyam ka tres sa iyang 27 puntos aron pangulogan ang Cavs sa 43 puntos nilang pagkastigo sa nagkagidlay nga Mavs.

Dako sab og naambag si Evan Mobley nga mitali og 22 puntos ug 11 ka rebounds ingon man si Darius Garland nga mihipos og 17 puntos ug 10 ka assists.

Si Jaden Hardy maoy nangu sa Mavs uban ang 21 puntos. Si Dante Exum mi-iskor og 14 apan si Klay Thompson naposasan ngadto lamang sa dos puntos.

Sa laing bahin, ang Boston Celtics dalaygon kaayong mibangon human malubong og 26 puntos aron tumbahon ang Philadelphia 76ers, 118-110.

Si Jayson Tatum mibubo og 25 sa iyang 35 points sa second half alang sa Celtics, nga mitagak og 20-1 nga bomba sa katapusang kuwarter aron patikangkangon ang Sixers.

Mihimo sab og kasikas si Jaylen Brown uban ang 21 puntos ug 10 ka rebounds, samtang si Kristaps Porzingis miamot og 18 puntos sa Celtics.

Si Tyrese Maxey mipabuto og 34 puntos apan nakawang ang iyang paningkamot sa Sixers.