Luka nagpasalamat sa iyang mga fans

CEBU, Philippines — Si Slovenian star Luka Doncic namahayag kagahapong adlawa nga nagtoo siya nga moduwa siya uban sa Dallas Mavericks sa tibuok niyang karera sa NBA.

Apan sa kalit lang natuldokan kining iyang pangagpas.

Kini human si Doncic gi-trade sa Mavs ngadto sa Los Angeles Lakers hulip kang Anthony Davis sa labing makapakurat nga pagbinayloay og player sa kasaysayan sa NBA.

Taliwala sa kasaba nga namugna ning makapakugang nga trade, si Doncic mipadangat sa mainiton niyang palasalamat ngadto sa mga fans niya didto sa Texas nga giisip na niyang pamilya.

"Seven years ago, I came here as a teenager to pursue my dream of playing basketball at the highest level," suwat pa ni Doncic sa usa ka mensahe sa iyang fans nga gi-post niya sa X. "I thought I'd spend my career here and I wanted so badly to bring you a championship."

"The love and support you all have given me is more than I could have ever dreamed of. For a young kid from Slovenia coming to the US for the first time, you made North Texas feel like home," dugang pa sa 25-anyos nga All-Star guard.

Si Doncic mi-establisar dayon sa iyang kaugalingon nga usa ka bitoon sukad siya miabot sa Dallas niadtong 2018. Nangu sa Dallas ngadto sa NBA Finals sa miaging season diin siya nahimong finalist alang sa MVP award, gipaabot unta siya nga mamahimong nawong sa Mavs sa umaabot nga mga katuigan.

Apan si LA Lakers general manager Rob Pelinka na hinoon ang mobandera sa usa ka batan-ong superstar aron mogiya sa Lakers ning panahon nga talisaop na ang karera ni LeBron James.

Human sa makapalugmay sa dughan niyang mesahe sa Dallas, si Doncic naglantaw sa unahan uban ang tumang kadasig ug kahinam pinaagi sa usa ka post diin siya nagsul-ot sa uniporme sa Lakers.

"Grateful for this amazing opportunity," pasdayag pa ni Doncic. "Basketball means everything to me, and no matter where I play the game I'll do so with the same joy, passion and goal -- to win championships."