Sud lamang sa duha ka hugna 

Capuloy mi-KO ni Tinampay aron langkaton ang WBF Australasian title

CEBU, Philippines — Ang pambato sa Big Yellow Gym nga si Rhonvex “The Body Snatcher” Capuloy mipatikangkang sa beteranong Bol-anon nga si Jason Tinampay sud lamang sa duha ka hugna aron sakmiton ang World Boxing Foundation (WBF) Australasian super featherweight belt sa main event sa “Bakbakan Uno” nga gipasiugdahan sa Big Yellow Promotions niadtong Martes sa gabii, Disiembre 10, didto sa Conequip Philippines showroom sa F.E. Zuellig Avenue sa North Reclamation Area, dakbayan sa Mandaue.

Samtang agresibo nga mi-ataki, ang 28-anyos nga si Capuloy kalit lang milandig og makusog nga suntok ngadto sa tiyan nga diha-diha nakapahagba ni Tinampay sa hingpit sa oras nga 1:15 sa ikaduhang hugna.

"Wala ko mag-expect nga mapaundang nako siya og sayosayo kay beterano sab si Tinampay. Natimingan lang gyud nako dayon siya," matud pa sa garbo sa Bais City, Negros Oriental.

"Salamat kaayo sa tanang mga nisuporta nako labi na sa among manager ug promoter nga si sir ninong Seth ug mam Mae Tio ug sa akong trainer nga si Pingping Tepora," dugang pa ni Capuloy human giinat ang iyang rekord ngadto sa 12-3-3 nga gidayan-dayanan na karon og 9KOs. Si Tinampay natagak sa 14-20-2 uban ang 11KOs.

Sa supporting bouts, ang laing batos sa Big Yellow nga si Reycar Auxilio (7-4-1, 5KOs) mipasurender ni kanhi ALA boxer Jess Rhey Waminal (16-12-1, 9 KOs)  pagkahuman sa ikaupat nga hugna, samtang si Arlando Senoc Jr. mi-TKO ni George Sedillo sa ikalimang hugna sa labing eksplosibo nga away sa maong pasundayag. 

Si Jusue “Pistolero” Bastillada mipilde ni Paolo Fortun pinaagi sa unanimous decision, samtang sila si Emji Felicilda ug Mark Anthony Sarino milampos sab pinaagi sa UD batok nilang Ronnie Urgel ug Norman Rusiana.

Si Johnrey Labajo mipaluhod ni Dixon Ercillo sa ikaduhang hugna samtang ang Taiwanese nga si Ming Hung Lee nanginahanglan lamang og usa ka hugna aron dispatsahon si Kim Lindog.