Labing unang PanagSogod fishing tourney malampuson

CEBU, Philippines —  Bisan pa man sa dautang panahon, nahimong mabulokon ang labing unang PanagSogod Fishing Tournament didto sa lungsod sa Sogod nga gisalmotan og 144 ka mga lokal nga mananagat ug anglers gikan sa nagkadaiyang dapit sa Sugbu ug Negros ning bag-ohay pa lamang.

Gipasiugdahan sa non-governmental organization Move Ko Aid ug Reels Events & Productions inabagan sa lokal nga kagamhanan sa Sogod, gibahin ang mga partisipante ngadto sa tulo ka kategoriya, 25 para sa lokal  nga mananagta gamit ang ilang tradisyonal nga mano-manong panagat; 38 para sa casting ug 81 para sa jiggers.

Sa casting category, diin ang mga anglers anha lang manukad sa baybayon, naghari si Arnulfo Pierra Jr., kinsa Palms Global and Relix Nusanstara brand ambassador ug sakop sa Cebu Anglers Club ug Cebu International School Fishing Club, pinaagi sa iyang 0.970kg grouper (Lapulapu).

Bisan nauwahi og abot si Pierra, nakuha niya ang maong isda sud lang sa pipila ka minutos diha sa pantalan diin ang ubang anglers napakyas sukad pa sa pagsugod sa buntag.

Nisunod kang Pierra si Christopher Maratas sa iyang 0.755KG needle fish (balo), sunod ang 0.433kg checkered snapper ni Dayunyor Mag-asin.

Sa jigging category, ang mga anglers mosakay og bangka ug adto sa lawod mamasol gamit ang jigging technique.  Si Camelo Soroño maoy nagkampiyon pinaagi sa iyang 4.450kg coral trout (Suno), ang first runner up mao ang 2.650kg Rusty Jobfish (Malaguno)ni Dindo Mondigo sunod si Lenox Cebu sa iyang 2.29kg Barracuda (Rumpe Kandado).

Una niini sa adlaw nga Sabado, nagtigi sab ang mga lokal nga mananagat sa ilang mano-mano nga pamaagi. Si Vicente Precillas Jr. maoy nanghawod pinaagi sa iyang 8.800kg Dorado o Mahi-Mahi nga giila sa ato nga Pandawan; sunod kaniya si Roel Imfante sa iyang 4.850kg Barracuda, ug Jini Trangia sa iyang 3.600kg Dorado.

Ang awarding ceremony gitambungan ni Vice Mayor Richard Streegan isip representante ni Mayor Lissa Marie “Moonyeen” Durano-Streegan, Move Ko Aid President Lyn Morro ug ilang treasurer nga si Chuchay Verches.

Ang kitaon sa maong kalihukan gamiton sa mga mahinungdanong kawsa sa Move Ko Aid.