Sa ilang pagbalik sa nasud karong Hapon heroes' welcome nag atang sa mga Pinoy Olympians

CEBU, Philippines — Usa ka engrandeng heroes' welcome ang nag-atang sa mga Pinoy Olympians nga gipangulohan ni Carlo Edriel Yulo sa ilang pagbalik sa nasud karong adlawa gikan sa malampusong kamapanya sa bag-ohay pang natapos nga Paris Olympics didto sa France.

Si Yulo misuwat og kasaysayan human milangkat og duha ka gold medals sa men's vault ug floor exercise sa artistic gymnastics, samtang ang mga boksingerong sila si Aira Villegas ug Nesthy Petecio mitunol og duha ka bronze sa labing nindot nga salida sa nasud sa labing bongga nga pasundayag sa paugnat sa kusog sa tibuok kalibutan nga mahitabo kausa lamang sud sa upat ka tuig.

Tungod sa paghatag nila og tumang kadungganan sa nasud, ang 115 ka milyon nilang mga kababayan moyukbo sa ilang pagkamabayanihon sa pagtaak nila og balik sa yuta nilang natawhan karong alas 4:30 sa hapon.

Gikan sa airport, si Yulo ug ang mga kauban niyang Olympians abi-abihon sa welcoming committee sa Philippine Sports Commission sa dili pa sila moderetso sa Villamor Airbase diin ang tagsa-tagsa nila ka mga pamilya naghuwat kanila.

Subay sa usa ka bonggang parada, molahos sila ngadto sa Malacañang diin mismo si Presidente Bongong Marcos ang modawat kanila.

Sama sa miagi, si Marcos gipaabot nga motunol sa mga insentibo sa mga atleta nga nakadaog og medalya.

Si Marcos lagmit nga mohatag og dugang bonus sama sa iyang gibuhat sa mga Pinoy'ng atleta nga nakadaog og gold medals sa Southeast Asian ug Asian Games.

Sa paglangkat niya og duha ka bulawan, si Yulo gipaabot nga makadawat og P20 million gikan sa kagamhanan, P6 million sa House of Representatives, P5 million sa ArenaPlus, P3 million sa Bounty Fresh ug Chooks-to-Go, P3 million sa Megaworld, P2 million sa dakbayan sa Manila ug posibleng malabo nga pahalipay gikan sa Manny V. Pangilinan Sports Foundation.

Wa pay labot niini ang house and lot sa Tagaytay gikan ni Philippine Olympic Committee president Abraham Tolentino ug ang tulo ka kuwatro nga condominium unit gikan sa Megaworld nga mibalor og P32 million.

Gikan sa Palasyo, si Yulo mobyahe og balik sa Hilton Manila sa Pasay diin usa ka victory party ang giandam kaniya ni Kevin Tan sa Megaworld. Sa maong kalihukan, pormal nga itunol sa Megaworld ang grasya nga ilang gibubo ngadtong Yulo.

Ang lokal nga kagamhanan sa Manila ubos sa liderato ni Mayor Honey Lacuna gikatakda sab nga mopasidungog sa bililhon nilang anak sa siyudad kansang ubos nga sinugdanan nagagikan sa kadalanan sa Leveriza diin si Yulo nahimusgo, nagdako, ug nadiskubrehan isip usa ka gymnast dayon na ngadto sa pagkulit og pangan isip labing bangiitan nga Pinoy Olympian sa kasaysayan.