San Carlos Run kasado na karong Dominggo
CEBU, Philippines — Andam na ang tanan alang sa San Carlos Run 2023 nga gipasiugdahan sa University of San Carlos (USC) Basic Education Department karong Dominggo, Marso 26.
Sugdan sa alas 5:30 sa buntag didto sa USC North campus, moagi kini sa General Maxilom Avenue dayon ngadto sa dalan B. Rodriguez ug V. Rama sa dili pa matapos sa USC South campus alang sa dul-an tulo ka kilometro nga distansiya.
Tuyo sa maong aktibidad mao ang pormal nga pagpahibawo sa pagbalhin sa USC North campus ngadto sa USC South campus.
"This is actually a prayer and ceremony that USC will have a great metamorphosis, a change in our campus," matud pa ni Fr. Rogelio Bag-ao, SVD, ang Provincial Superior sa SVD-PH Southern Province atol sa pormal nga paglusad sa maong kalihukan kagahapon didto sa Norton Hall sa USC-North campus.
Si Bag-ao giduyogan nilang USC-BED Director Fr. Alfonso Araceli, SVD, Fr. Orencio Rodriquez, SVD,USC-North Principal Rovelyn Mina, assistant principal Jeanette Fontanosa, athletics coach James Ludwig Geconcillo, San Carlos Run coordinators Neil Sasan ug Galimar Largo, ug ang basketbolistang si Reinhard Jumamoy nga moapil og dagan agi'g suporta sa pinangga niyang tunghaan.
"It's a symbolic run marking the formal transfer of the USC North campus to the USC South campus," dason pa ni Araceli. "The response was very positive because they are very enthusiastic about this activity."
Sa karera, dunay mga kategoriya alang sa pamilya, estudyante (grade school ug junior high school) ingon man faculty ug staff. Ganting salapi ug medalya ang itunol ngadto sa mga mananaog.
Ang rehistrasyon nagkantidad og P450 apil na niini ang souvenir shirt ug snacks.
- Latest
