Celtics mibugha sa Kings

CEBU, Philippines — Si Jayson Tatum mipaulbo og 36 puntos sa dihang gipatikangkang sa Boston Celtics ang Sacramento Kings, 132-109, sa NBA kagahapon didto sa Golden 1 Center sa Sacramento, California.

Mihimo sab og kasikas sila si Jaylen Brown ug Derrick White nga nagkumboya'g 47 puntos alang sa Celtics.

Si Domantas Sabonis mihipos og 16 puntos, 13 ka rebounds ug 12 ka assists samtang si De’Aaron Fox dunay 18 puntos alang sa Kings nga nasagunsonan og pilde sa unang higayon sukad niadtong Pebrero 5.

Didto sa New York, si Donovan Mitchell miposa og lima ka tres sa iyang 31 puntos sa dihang gipayaka sa Cleveland Cavaliers ang Brooklyn Nets, 115-109. Gipaluyohan siya ni Caris LeVert nga mipupo og 18 puntos.

Tungod sa kadaogan sa Cavs, ang Philadelphia 76ers hingpit nga naka-angkon og luna sa playoffs bisan og wala kini motikang sa korte kagahapon.

Sa laing duwa, si Trae Young mikolekta og 30 puntos ug 12 ka assists aron pangulohan ang Atlanta Hawks ngadto sa 129-107 nga paglampaso sa Detroit Pistons.

Dako sab og naambag si Bogdan Bogdanovic nga milansang og tulo ka 3-pointers sa nagkayong 16-0 run sa sayong bahin sa second half nga nakapaugpo sa Hawks ngadto sa kalamposan.

Bitbit ang tablang 36-36 record, ikawalo karon ang Hawks sa Eastern Conference standings.

Didto sa New Orleans, si Brandon Ingram mipatuasik og 32 puntos samtang si Jonas Valanciunas midugang og 19 puntos ug 15 ka rebounds sa dihang gilampornas sa Pelicans ang San Antonio Spurs, 119-84.

Sila si Trey Murphy III ug CJ McCollum nagkumbinar og 32 puntos alang sa Pelicans nga dominante kaayo ug sa usa ka higayon naglabaw og 36 puntos.

Sa laing resulta, si Pablo Banchero mihipos og 18 puntos, siyam ka rebounds ug walo ka assists sa dihang gimakmak sa Orlando Magic ang Washington Wizards, 122-112.

Si Gary Harris mi-iskor og 22, si Franz Wagner midugang og 20 puntos samtang si Cole Anthony mitapos uban ang 16 puntos, pito ka rebounds ug lima ka assists alang sa Magis.

Si Kristaps Porzingis miharos og 30 puntos alang sa Wizards nga napilde sa ikaunom nga higayon sa miagi nilang pito ka duwa.