CEBU, Philippines — Gipakita ni Irish Conor McGregor nga dili pa siya laos ug usa gihapon siya sa labing sikat nga combat athlete human niya gipaundang sud sa 44 segundos ang Amerikano nga si Donald Cerrone sa Ultimate Fighting Championship didto sa Las Vegas.
Si Mcgregor migamit sa bangis nga kombinasyon nga gitapos sa usa ka head kick dayun buk-buk ni Cerrone kinsa daling giluwas sa referee sa dugang kadaotan.
Ang two-division UFC champion mibalik human sa tulo ka tuig nga pagpahuway human usab sa duha ka sunod-sunod nga kapildehan una batok Floyd Mayweather sa usa ka boxing match dayun ang second round nga TKO nga kapildehan sa mga kamot ni Russian Khabib Nurmagumedov.
“I feel really good, and I came out of here unscathed,”matud ni McGregor sa Associated Press. “I’m in shape. We’ve got work to do to get back to where I was.”
Dungan sa iyang kadaugan, daling giuwan sa pangutana si McGregor kung kinsa iyang sunod nga sangkaon.
Si McGregor gipaabot dayon kung kinsa iyang sunod sangkaon sa UFC nga naglakip sa rematch batok Nurmagumedov o rematch tali ni Mexican-American Nate Diaz.
Hinuon, mas nikawat og interes ang posibilidad nga usa ka boxing match niya batok Pinoy ring icon Manny Pacquiao.
Si Pacquiao gihagad ni Mcgregor ug dali usab nga miingon nga bukas siya sa posibilidad.