CEBU, Philippines – Hangtod karon padayon pang gitimbangtimbang ni Kawhi Leonard kon asa siya nga team mobalhin ug mopirma'g bag-ong kontrata.
Si Leonard migiya sa Toronto Raptors ngadto sa makasaysayanong NBA title sa miaging bulan human gipilde ang Golden State Warriors.
Ang two-time Finals MVP gipaabot nga makigtagbo sa Los Angeles Lakers ug Los Angeles Clippers ug ingon man sa Raptors sud ning semana sa dili pa mopakanaog og desisyon kon asang team siya gusto moduwa sunod NBA season.
Ang Lakers mihawan og dakong espasyo sa ilang salary cap sa tinguha nga makapresentar og maayo nga tanyag ngadto ni Leonard.
Kon ugaling molampos pagkubit sa labing mahalon nga player sa nagpadayong NBA free agency, si Leonard wa'y lalis moporma og kahadlokang 'superteam' sa Lakers uban nilang LeBron James ug Anthony Davis.
Si Leonard nga nagdako sa Los Angeles, mipadayag sa sayo pa nga interesado sab siyang moduwa sa Clippers. Wala sab hinuon niya gisalikway ang posibilidad nga mobalik siya sa Raptors nga makahatag kaniya og lima ka tuig nga kontrata nga mobalor og $160 million.
Sa lain pang mga kalamboan, si D'Angelo Russell napunta sa Golden State Warriors bugti sa upat ka tuig nga kontrata nga mibalor og $117 million human ilang gi-trade si Andre Iguodala ngadto sa Memphis Grizzlies.
Si Russell mao unya ang ikatumpang ni Stephen Curry sa backcourt sa Warriors hangtod nga makabalik na og duwa si Klay Thompson gikan sa nahiaguman niining injury sa iyang tuhod. Si Thompson miuyon nga magpabilin sa Warriors sud sa lima ka tuig sa kantidad nga $190 million.
Lain pang mga free agents nga hangtod karon wala pa mopirma og kontrata mao sila si Toronto guard Danny Green, Golden State center DeMarcus Cousins ug Lakers pointguard Rajon Rondo.