CEBU, Philippines - Daog maoy misugat sa unang duwa sa Power Forty human ilang gilubong ang Blessil Tungkil, 76-54 sa unang adlaw sa aksiyon sa Guadalupe Golden 50’s Basketball Club First Conference niadtong Domingo sa buntag didto sa Guadalupe Sports Complex.
Misalida og maayo silang Michael Arias ug Teody Ebrado ug parehong miiskor og 17 puntos aron pangulohan ang Power Forty nga dominante kaayo sa maong duwa.
Duha sab ka players sa Blessil Tungkil ang miiskor og double digits.
Sa sayo pa, ang McMill Enterprises gisubhan sab og daog pinaagi sa pagdominar sa tibuok duwa batok sa MCWD Union, 55-37.
Si Elizalde mikadlit og 12 puntos, gisundan nilang Commendador ug Abano aduna’y tag-10 puntos. Ang MCWD Union gipangulohan sab nilang Alvarez ug Sempron nga mikandos og 10 puntos matag usa.
Gisugat sab og daog ang Pardo Builders dihang ilang gilubong ang BTBA sa iskor nga 84-68.
Sila si Danny Lim ug Roy Abella maoy kuyaw nga nakaduwa ug gipangulohan nila ang Pardo Builders nga miburak og 17 puntos matag usa. Laing nakahimo og double figures sa Pardo Builders mao silang Opong Zafra, Nestor Solatorio ug Onyot Belande.
Nausik ang 22 puntos ni Ramon Ceballos kay nasugamak ang BTBA.
Ang liga nahimo sa paningkamot nilang Serge Cortez ug Raul Sollano, inabagan nilang Lito Posadas ug Gaga Cabanilla isip chairman. Ang duwa gipadagan ni technical committee Edwin Dejacto Sr.
Puntos matag usa
Unang duwa:
McMILL Enterprises (55) – Elizalde 12, Commendador 10, Abano 10, Feniza 6, Cenabre 6, Gabutero 4, Ancot 3.
MCWD Union (37) – Alvarez 10, Sempron 10, Abanilla 8, Arroz 7, Salcedo 2.
Ikaduhang duwa:
POWER Forty (76) – Arias 17, Ebrado 17, Cañete 9, Cantarona 9, Moniva 8, Cabatas 6, Lim 4, Labalan 2, Mosqueda 2, Rama 2.
BLESSIL Tungkil (54) – Cañete 16, Rivera 12, Gonzalez 8, Yares 7, Booc 5, Alinabon 4, Cincoflores 2.
Ikatulong duwa:
PARDO Builders (84) – Lim 17, Abella 17, Zafra 15, Solatorio 14, Belande 12, Rosito 5, Abbu 2, Villarta 2.
BTBA (68) – Ceballos 22, Chinghay 7, Cabreros 6, Honoridez 6, Despi 6, Caburnay 6, Caballero 5, Rocamora 4, Caballero 4, Desuyo 2. (BANAT NEWS)