CEBU, Philippines - Dakung kalampusan ang naangkon sa Sacred Heart School-Ateneo de Cebu (SHS-AdC) ug Lahug FC human maghari sa tagsa-tagsa nila ka dibisyon sa 16th Aboitiz Cup football tournament kagahapon didto sa Aboitiz Sports Field sa Brgy. Subangdaku, dakbayan sa Mandaue.
Ang SHS-AdC mipukan sa University of San Carlos-Basic Education, 2-1 aron langkaton ang korona sa under-11 division.
Gawas sa pagdaog sa titulo, ang magduduwa sa SHS-AdC nga si Matthew Suico maoy napiling MVP, samtang si Elliot Selman nidaog isip best scorer award nga adunay 20 ka goals sa kinatibuk-ang season. Si Kylle Ranitti maoy best goal keeper.
Si Jaypee Flors sa USC maoy best midfielder ug si Mark Canedo ang best defender.
Sa duwa alang sa ikatulong dapit, ang Don Bosco Technology Center (DBTC)-1 mipilde sa Lahug FC, 2-0.
Hinuon, ang Lahug FC miiskor og tam-is nga panimalos pinaagi sa pagpilde sa DBTC-D, 2-1 aron maghari sa under-9 division.
Nahimong MVP sa duwa mao si John Daniel Betinol sa Lahug FC, samtang ang iyang teammate nga si Nikki Apura napiling best goal keeper.
Ang DBTC midaog og tulo ka special awards kortesiya nilang Alexander Villarosa (best scorer), Joseph Garces (best midfielder) ug Joross Tabar (best defender). (BANAT NEWS)