Gwen Garcia inutil na
Niang lista sa upat ka rason nganong, bisan sa panghadlok nga human sa pagkanaog sa Kapitolyo mapugos gihapon si Governor-elect Pam Baricuatro pagpadayon sa pagpatuman sa iyang Suroy Suroy Sugbo ug ubang paukyab nga mga proyekto, laos ug inutil na si Gwen Garcia, pila ka adlaw sa wala pay Hunyo 30:
• Wala suportahi sa mayoriya sa Cebu Provincial Board ang iyang gipangayo nga P1.2 bilyones nga supplemental budget para ni Vice Governor-elect Glenn Soco ug pagbalhin sa 100 ka trabahante gikan sa executive department (aron pag-inutil ni Baricuatro) ngadto sa legislative department (aron paghimong mas gamhanan ni Soco);
• Gi-boykot na sa mga mayor ang panamilit niyang kalihokan, apil nang pasundayag sa mga produkto sa ikatulong distrito sa Sugbo sa Robinsons Galleria nga gitambongan ra sa mayor sa Pinamungajan pero giisnab sa mga mayor sa Aloguinsan, Asturias, Balamban, Tuburan ug bisan sa iyang kaugalingong pag-umangkon nga si Mayor John-John Garcia sa Barili nga posibleng nipatuo sa tambag sa iyang mga uyoan nga silang kanhi GSIS President ug General Manager Winston Garcia ug outgoing Representative Pablo John Garcia nga niila na sa kadaogan ni Baricuatro ug niawhag na niya pag-angkon sa kapildehan (gani, si Pablo John niawhag og pagtahod sa preventive suspension order sa Ombudsman);
• Wala siya igkita sa pagpanumpa sa niaging semana nilang Talisay City Mayor Samsam Gullas, Kongresista Rhea Gullas ug ubang mga mananaog sa unang distrito sa Sugbo (diin gilubong siya ni Baricuatro og taga liog sa tanang syudad ug lungsod sa niaging eleksiyon), nga dili unta hatagan og mas dakong kahulogan kon wala pa imbitaha sa mga Gullas si Baricuatro (bisan dakong buhi ug gobernador pa si Garcia) isip commencement speaker sa gradwasyon sa ilang College of Law niadtong Domingo; ug
• Mahimo ganing dili lang ang mga Gullas maoy nagsugod na og distansiya gikan ni Garcia kay hangtod karon, kapin na usa ka buwan human siya nidangop sa Commission on Elections (Comelec), wala pay bisan usa ka kongresista, mayor, kapitan ug konsehal nga nisuporta sa election protest nga nipasangil nga bisan sa iyang lig-on nga koneksiyon sa administrasyon gimaniobra ang automated counting machines (ACMs) sa pag-ihap sa iyang mga boto pabor ni Baricuatro.
* * *
- Latest
