Dili malubag nga silot
Mahimong dili madutlan si outgoing Governor Gwen Garcia sa silot nga gipahamtang sa Ombudsman tungod sa iyang pagsupak sa unom ka buwan nga preventive suspension order nga nagsugod unta niadtong Abril. Tungod sa kadaghan sa mga abogado ug abogada ni Garcia, ug sa mas daghan niyang lutsanan, dako ang posibilidad nga maapsan sa panahon ang P30,000 nga multa batok niya.
Kay ang dili kalugwayan nga pito ka tuig nga termino ni Ombudsman Samuel Martires mapupos karong Hulyo 27, 2025 (gitudlo siyang kanhi Presidente Rodrigo Duterte niadtong Hulyo 26, 2018).
* * *
Ambot interesado ba ang bag-ong Ombudsman nga itudlo ni Presidente Ferdinand Marcos Jr. sa pagpadayon pag-imbestigar sa mga kaso ni Garcia:
Kon magpabiling alyado sa presidente si Garcia, ang bag-ong Ombudsman mas motutok sa mga kaso batok sa mga kaatbang sa administrasyon (gawas kon maka-tsamba si Marcos pagtudlo og opisyal nga mopalabi sa kaligdong kay sa utang kabubut-on); o
Maapiki lang si Garcia kon sakto ang iyang pagduda nga dili ang mga Duterte maoy nakapa-suspenso niya kon dili ang dagkong mga negosyante nga naigo sa mga lagda sa Kapitolyo.
* * *
Kon maka-ikyas na sab, masumpayan ang lista sa malampusong paglikay ni Garcia sa mga silot:
Iyang 42 ka adlaw nga barikada sa Kapitolyo niadtong Disyembre 2012 ug Enero 2013 human gipa-suspenso ni anhing Presidente Noynoy Aquino tungod sa pagyatak sa gahom ni anhing Bise Gobernador Greg Sanchez; ug
Iyang pagtago sa House of Representatives human giluwatan ni kanhi Ombudsman Conchita Carpio Morales og dismissal order niadtong 2018 tungod sa Balili property.
* * *
Maayo na lang nga bisan sa ka-inutil sa Malakanyang ug sa Ombudsman pag-disiplina ni Garcia, dunay mas gamhanang puwersa nga wala na mopasaylo sa iyang kadangog. Samtang nakapasalipod siya sa taas nga mga korte sa nasud, ginamit ang daghan uyamot nga mga buslot sa sistema sa hustisya, ang labing gamhanang hukmanan nimatuod nga dili siya kublan sa balaod.
Ang kapin sa 1.1 milyones ka mga Sugboanon nga nilubong ni Garcia og taga liog sa eleksiyon niadtong Mayo 12 maoy ni-seguro nga, bisan unsaon pa niya og maniobra, pamanghag ug pamintaha, mapalayas siya sa Kapitolyo inig hagtok sa udtong tutok karong Hunyo 30.
* * *
- Latest
