Ang dalan sa kahingpitan ni Santa Teresa de vila

AMAHAN NAMO. Alang kang Santa Teresa de Avila kabubut-on sa Dios nga kita pagaisipon nga mga anak sa Dios. Alang niya ang langit usa ka kahimtang diin atong gitagamtam ang kahayag ug himaya nga Diosnon. Bisan pa man sa  atong kahuyangan, ang Dios sa gihapon nitugob kanato sa iyang kalooy ug grasya. Mga grasya nga gikinahanglang pag-ayo nato aron kita mabuhi. Ang kabubut-on sa Dios maoy pinakamaayo sanglit siya man ang atong amahan.

NGA ANAA KA SA MGA LANGIT. Hinimong giya ang panlantaw ni San Agustin si Santa Teresa nagpasabot nga mas mahinungdanon ug makiangayon kaayo nga atong pangitaon ang Dios diha sa atong kasingkasing.gikinahanglan  nga atong hawanan ang atong kasingkasing, hunahuna ug ang tanan nga ania kanato aron ang Dios makasulod ug maoy mopuno kanato.

BALAAN ANG IMONG NGALAN, MOABOT ANG IMONG GINGHARIAN. Pinaagi sa pagsangpit ning maong tudling atong gihangyo ang Dios nga kun mahimo iyang ihatag kanato kun unsa gyud ang makaayo alang kanato. Sa dili pa kita mangayo sa Dios ug bisan unsa ato unang pangutan-on ang atong kaugalingon kun ang atong gipangayo makaayo ba kanato o dili? Bisan pa man kun ania pa kita dinhi sa kalibutan mahimong masinati nato ang langit kun husto lang ug gitugotan sa Dios ang atong gipangayo.

MATUMAN ANG IMONG PAGBUOT DINHI SA YUTA MAINGON SA LANGIT. Nagpasabot lamang kini nga sa tanang mga butang nga atong pagahimoon ang kabubut-on sa Dios maoy matuman. Gikinahanglan kaayo kini ug nanginahanglan kita sa Dios.

ANG KALAN-ON NAMO SA MATAG ADLAW, IHATAG NAMO KARONG ADLAWA. Ang Diosnong pag-amoma maoy nakapahimo kanatong ania pa karon…. Pinaagi kang Jesus kita gilig-on ug giamomahan. Kini tungod kay sinati sa atong Ginoo ang atong kinaiya ingon man ang atong mga panlimbasog ug kalisdanan sanglit niambit man siya sa atong pagkatawhanon. Kun ang atong Ginoo nihatag sa kinatibuk-an sa iyang kaugalingon alang kanato, kita pud unta ang mopuno sa atong hunahuna ug kasingkasing sa mga butang nga iya ni Kristo Jesus.

PASAYLOA KAMI SA AMONG MGA SALA. Ang pagkamapaubsanon kinahanglanon kaayo aron ang Dios maoy mohari kanato ug sa atong kinabuhi. Ang kinabuhi sa mga Santos nagtudlo kanato nga diha lamang sa mapaubsanong pag-angkon sa atong mga kasaypanan ang Dios malooy kanato. Kay dili siya buot sa halad sinunog kondili sa usa ka mapaubasanong kasingksing ug mahinulsolong Espiritu. Sa atong pagtagamtam sa kalooy ug pasaylo sa Dios kini pud unta magdala kanato sa pagpasaylo sa uban nga nakasala kanato.

UG DILI MO KAMI ITUGYAN SA MGA PAGSULAY. Si bisan kinsa nga nangita og kahingpitan ang dili malisang sa bisan unsang matang sa pagsulay. Alang kanya kun ikaw ikaw mag-ampo sa kanunay wala kay angay nga kabalak-an. Sama sa mga sundalo atong gamiton ang hinagiban sa pag-ampo aron kita molahutay sa bisan unsang matang sa pagsulay.

HINUNOA LUWASA KAMI SA DAUTAN. AMEN. Dili mahitabo nga ang gahom sa kangitngit magmdadaugon batok sa gahom sa kahayag. Ang yawa dunay takna, apan ang Dios dunay eternidad. Alang kang Santa Teresa ang dautan mao kadtong nagkadaiyang matang sa mga babag, sakit ug mga pagsulay diha sa atong kinabuhi sa pangalagad sa Dios. Busa kita mag-ampo gyud sa hilabihan ug dili mahitabong motahan diha diha dayon sa tinguha sa dautan.