Pagpamalandong matag Domingo

Maayong Balita

Kuyog sa atong Ginoo ang iyang  mga tinun-an nakasud-ong kaniya nga nisaka ngadto sa langit. Sa wala pa siya mosaka ngadto iyang gipanghimanongnoan ang iyang mga tinun-an nga magpabilin sa Jerusalem ug magpaabot sa Gasa sa Espiritu Santo nga ipadala kanila sa Amahan. Tuod man ang mga tinun-an nagpabilin sumala sa kamandoan. Matag adlaw tua sila sa templo nag-ampo ug nagdayeg sa Dios, naminaw sa mga pagtulon-an ug nagpaambit sa bisan unsa nga anaa kanila.

Kasinatian

Karon Domiggoha gisaulog usab ang World Communications Sunday. Gidasig kitang tanan nga mamahimong hamtong ug makiangayon sa paagi nga atong gamiton ang kahimanan sa komunikasyon labina ang social media platforms karong mga panahona. Gamiton unta kini sa pagsangyaw sa bisan unsa nga tinuod ug makadasig. Gamiton unta kini sa pagsangyaw sa pulong sa Dios ug dili gamiton sa pangdaut sa atong isigkaingon ingon man ang pagsabwag sa mga mensahe sa pagpanghadlok. Unta makamatngon kita sa dakong kinahanglanon sa pagsangyaw sa kamatuoran.

Lihok

Ayaw og ikyas sa dapit o aspeto diin ikaw huyang. Hinunoa, atubanga kini uban ang tumang pagtuo ug pagsalig nga makabangon gihapon ka human sa pagkalukapa.

Pangamuyo

Tanan: Ginoo, dasiga ug lig-ona kami. Unta among masangyaw ang imong kaayo ngadto sa uban. Ubani kami kanunay tungod kay halayo kanimo wala man kami mahimo.