Resulta sa maayong pagdumala

Gipangayo ni Presidente Marcos ang courtesy resignation sa tibuok gabinete, mga opisyal nga adunay ranggo sama sa gabinete, mga presidential advisers ug assistants ug ubang hepe sa mga ahensiya. Dugang pa sa presidente, namulong na ang katawhan ug nangita sila’g resulta, dili pamolitika.  Dili kay lang karon nga ang resulta gihandom sa katawhan kon dili sa pagsugod pa lang ni’ng administrasyon.  Angayan hinumduman sa atong mga lider nga ang hamubo nga panglantaw, kaaway sa maayong pangagamhanan.  Kay ginaingon man nga “Kon ang nagdumala maayo, dili gayod mahimong laksot ang pangagamhanan.”  Muleeng!

Sama sa rollercoaster

Giawhag sa Stratbase Institute, usa ka nag-unang think tank group, ang kagamhanan nga palapdan pa ang pakiglambigit niini sa pribadong sektor aron matubag ang gintang sa digital transformation sa atong sistema sa edukasyon.  Kinahanglan tinuod nga mamoderno na ang pamaagi sa pagtudlo ug dako ang ikatabang sa pribadong sektor.  Kon walay tabang gikan kanila, hayan magpabilin nga mangiwit ang atong mga tinun-an.  Kay matud pa bitaw, “Ang sistema sa edukasyon sa Pilipinas, nahisama sa rollercoaster, daghang liko-liko, hagbong-hagbong ug sawom-sawom apan mosangpot ka ra gihapon sa sama’ng lugar diin ka magsugod.”  Fezteleern!

 Hand-right drive gihapon

Miluwat ang Land Transportation Office (LTO) og preventive suspension order sa accreditation sa Cebu Titan Supplies, usa ka importer ug mamaligyaay og sakyanan, tungod sa pag-import ug pagpamaligya niini og mga right-hand drive (RHD) nga mga sakyanan.  Kalapasan kini sa Republic Act 8506.  Dako tingale ang bugti nga ginansiya mao nga gituyoan gyud kini sa Cebu Titan bisan ginadili.  Komento pa sa akong amigo, “Bisan balihon pa sa Cebu Titan ang mga letra gikan sa RHD ngadto sa HRD, dili gihapon kini makalusot kay dili man kini pagasabton sa LTO nga Human Resource Department kon dili Hand-Right Drive gihapon.  Madahaan!

Wedir-wedir lang

Namahayag si Senador Imee Marcos nga adunay pipila niya ka kauban sa umaabot nga Senado ang miawhag kaniya sa pagtinguha sa Senate presidency.  Wala hinuon ibutyag sa senador ang iyang tubag sa maong awhag.  Kon ugaling makuha ni Senador Imee Marcos ang labing taas nga posisyon sa Senado, maingon nato nga dagtom na ang kaugmaon sa impeachment trial sa bise presidente.  Kining matang sa panghitabo haum sa giingon sa usa ka politiko nga “Ang politika sa Pilipinas, “wedir-wedir” lang gyud.”  Mao maan!

Utangan pa gihapon

Miluwat og show cause order ang Ombudsman nga nagmando kang Governor Gwen Garcia ingon man sa DILG aron mapasabot nila ang ilang wala pagtuman sa suspension order nga gipahamtang sa Ombudsman ngadto sa gobernador.  Matagbaw ba kaha ang Ombudsman sa ilang eksplanasyon?  Labot pa, tungod kay napilde na man ang gobernadora, aduna pa ba unya’y kasibot ang Ombudsman sa pagpatuman sa suspension order?  Matud pa sa akong amigo, “Kay pildi na man si Gwen, kon ipatuman gyud ang suspension, utangan pa ang gobernadora og upat ka buwan nga pagka-suspendido.”  Pagkatoytoy!