EDITORYAL — Maayong pang-ilisan

Sa usa makapakurat apan pwedeng isipong maayong lakang, gimandoan ni Presidente Ferdinand Marcos Jr. ang tanang kalihim sa gabinete niini nga moduso sa ilang courtesy resignation kagahapon.

Tanang mga gabinete misanong niini ug miduso sa ilang resignation letters diha sa Office of the President. Dunay mga intriga nga tungod kini sa resulta sa nakalabay nga eleksyon diin unom lang sa iyang mga kandidato sa pagkasenador ang nakadaog.

Gitan-aw kini sa uban nga repleksyon sa diskuntento sa mga tawo ngadto sa administrasyon. Apan ang mga kalihim ba gyud maoy hinungdan?

Wala ba gyud tinuod mabatyagi sa katawhan ang mga programa sa presidente? Angay hinumdoman nga sa pagsugod palang sa unang tuig sa pamunoan ni Marcos nagpungasi na ang mga kaguliyang tungod sa pagkabungkag sa UniTeam nila ni Bise Presidente Sara Duterte. Sud sa tulo ka tuig niyang paglingkod, mura og adunay dag-om nga nihabol sa iyang administrasyong tungod ani. Kini tungod kay di ikalimod dunay mga supporters ang mga Duterte nga dili basta mapugngan ang kasagmuyo nga sa social media gipakatap.

Apan kun tinuod nga diskunteto ang mga tawo kang BBM nganong nakadaog man ang unom sa iyang mga kandidato samtang ang sa kampo ni Duterte upat lang?

Hinuon makaalarma gyud kini kay wala pa sukad sa kasaysayan sa eleksyon sugod sa panahon sa administrasyong Arroyo nga ang administration bets wala makapang-haros sa midterm elections.

Apan maayo kini kay kining gibuhat ni PBBM makapabuka sa mga mata aning mga cabinet members nga nagmika sa ilang trabaho. Pagpakita sab kini nga dunay gahum pagkontrol ang pangulo sa dagan sa iyang administrasyon. Dunay gahum ubos sa Konstitusyon ang presidente sa nasud nga tangtangon sa pwesto ang mga miyembro sa iyang gabinete kun sa iyang tan-aw wala sila makaabot sa iyang pangagpas nga serbisyo.

Hinuon, bisag niduso na sila sa ilang courtesy resignations, ang desisyon kun makabalik ba sila o dili, mag-agad kang PBBM. Maayo unta og dili na pabalikon kadtong mga nagmika nga mga kalihim.

Aning paagiha, dunay dakong kahigayonan nga magkinto ug motrabaho og tarong kining mga bag-o o magpabiling kalihim.