PRRD sa kasundalohan-kapolisan gisuportahan

Responsibilidad sa Armed Forces of the Philippines (AFP) ug Philippine National Police (PNP) ang pagprotehir sa atong nasud ug katawhan oras nga pasipad-an ang atong katungod sa mga dautang puwersa, kinsa nakahatag og makalilisang kakuyaw sa atong pagpuyo ug sa inadlaw tang pagpanginabuhi.

Ang nagakasakang gidaghanon sa krimen kada adlaw; ang pagbaha sa gidiling drugas sa tibuok nasod nga maoy tuburan sa mga dagkong krimen; ang walay pulos tang Kongreso, nga imbes magpanday og mga anti-corruption nga balaod, nagsige na hinuog gukod-piit ni Vice Presidente Sara ‘Inday’ Z. Duterte hangtod ilang gyong gi-impeached sa tumang kasayon; ug labaw sa tanan, kadtong pagkidnap-tugyan ni kanhi Presidente Rodrigo Duterte (PRRD) ngadto sa mga banyagang kamot sa International Criminal Court, The Hague, Netherlands, may mga maisog bang kasundalohan-kapolisan ang mipugong-midepensa kaniya?

Ay, pastilan, Ang mga AFP-PNP nga gipangulohan sa mga heneral pa hinuoy nangunay sa maong linuog nga buhat! Busa, luwas pa ba kitang mga Pinoy niining mga opisyales sa AFP-PNP nga pulos pinili niining huyang ug sobra ka bakakong Presidente Bongbong Marcos Jr.?

Natubag kining pangutanaha sa migulang resulta sa AFP, PNP and Media Practicioners Absentee Voting, midterm 2025 election. Diin tanang PDP Laban Duterte ten senatorial candidates, apil na ang gipaapas duha ka ex-military officials nga giinderso ni PRRD, ang tanan maoy midaog sa ilang balwarte, gawas ni Mata, Doc Marites nga nahipunta sa No. 13 sanglit nasingitan ni Bonifacio Bosita, retiradong colonel nga maoy nakakapyot sa No. 12, base sa Comelec website nga gi-post sa Achlight News sa social media.

Kini nagmatuod lamang nga sa hilom, aduna pa gyod gihapoy daghang kapolisan-kasundalohan gikan sa tag-as og ranggo ngadto na sa kinaubsan, kang kansang kasingkasing pro-good governance diay, pro-PRRD pa rin, kinsa tinuorayng nagmahal-naghigugma-nagpangga sa atong nasod ug katawhan. Ang nakaporke lang, kay dili sila makadili sa bisan unsay gustong ipabuhat sa ilang labaw sanglit military rule man ang: ‘obey first before you complain!’

Hinungdan, nga sa absentee voting na lang nila gibuhos ang hagbay rang gitipigan nilang pag-alkontra. Dihang miingon ang ilang commander-in-chief nga ang iyang 12 ka senatorial candidates segurado nang maoy modaog sa 2025 midterm election, ay sus, ilang gi-zero, uy!