12 ka sugyot parang Pam
Human sa paghangop sa mga Sugboanon sa iyang saad sa pagpahunong sa Suroy-Suroy Sugbo ug Pasigarbo sa Sugbo, si Governor-elect Pam Baricuatro segurong makakuha og mas lapad nga suporta kon mohunong sab sa:
• Pagpamalit og yuta ilawom sa dagat;
• Pagtukod og building ginamit ang kapin sa bilyon ka pesos nga buhis sa mga Sugbuanon nga magguba dayon sa linog ug bagyo, ug mahimo na lang evacuation center sa mga biktima sa sunog;
* * *
• Pag-upaw sa kabukiran ug paggasto og minilyon ka pesos sa buhis sa mga Sugbuanon aron ipalayo ang Kapitolyo gikan sa kinabag-an sa mga magbubuhis sa walay pagkonsulta nila;
• Pag-inutil sa provincial hospitals pinaagi sa paglaslas sa budget ug pag-outsource sa healthcare workers aron lang pagpanimawos sa iyang mga kaatbang sa politika;
• Pagpatuo nga mas epektibo ang tuob kay sa mga panagang ug tambal nga napamatud-an sa siyensiya (labi nang nisulbong pagbalik ang mga kaso sa Covid-19 sa ubang kanasuran);
* * *
• Pagsupak sa kalibotanong protocols batok sa African Swine Fever (ASF) ug paghulga nga ikiha ang mga opisyal sa Bureau of Animal Industry (BAI) nga igo lang nagtuman sa ilang trabaho pagpanalipod sa industriya sa baboy;
• Pag-usik-usik sa minilyon ka pesos sa buhis sa mga Sugbuanon aron ipamalit og mga kamera ug ubang mga ekipo para sa TikTok ug ubang taphaw nga mga paukyab dili para sa probinsiya kon dili para sa, nakatag-an ka, gobernadora;
• Pag-boykot sa Sinulog ug pagwaldas og minilyon ka pesos sa buhis sa mga Sugboanon isip premyo sa sipsip nga mga mayor nga nikuyog pagbugal-bugal sa imahen ni Senyor Sto. Niño para sa pamolitika;
* * *
• Pag-apiki sa mga negosyante nga gipasanginlang wala mo-amen niya o nakigkumpetinsiya sa iyang mga paryente ug mga higala;
• Pag-angkon nga siyay tag-iya sa Sugbo ug pag-insistir nga kontrolado niya ang Sugbuanong mga botante;
• Pagsupak sa lehitimong mga sugo sa Ombudsman ug ubang mga ahensiya sa gobyerno ug paghudlat sa opisyal sa nasudnong gobyerno nga mosukwahi niya ginamit ang No. 10; ug
• Pagkiha aron pagpahilom sa mga doktor, nurses, sakop sa media ug si bisan kinsa nga mangahas sa pagsaway sa Suroy-Suroy Sugbo, Pasigarbo sa Sugbo ug tanang nalista sa ibabaw gikan sa No. 1 ngadto sa No. 11.
* * *
- Latest
