Padre Ebyong

Sa pagsulod nako sa Theology Department sa seminaryo nga mao ang Seminario Mayor de San Carlos, si Ebyong mao gyud ang una nakong nahimamat. Siya si Oliver Bolongon nga taga Diocese of Dumaguete ug taga San Juan, Siquijor. Kugihan si Ebyong. Himasa yano lang ang pagkinabuhi.

Sa laing bahin, maayo pud siya motigom. Dili palagasto. Dungan ming naordinahan pagka dyakono niadtong Nobiyembre 7, 2005 ug si Anhing Ricardo Cardinal Vidal ang niordena kanamo. Dungan pud mi og graduate sa Theology niadtong March 21, 2006.

Ug gikan niadto panagsa na lang kami magkita, kasagaran sa mga PADS ALUMNI HOMECOMING NA LAMANG. Nahimo na kaming busy sa mga gimbuhaton sa tagsa tagsa namo ka mga kalihukan isip mga pari ning parasan sa Ginoo.

Ning ulahi, ako nahingangha sa dihang human sa akong pag-charge sa akong cellphone maoy akong nakita ang balita nga nitaliwan na diay intawon ang akong classmate ug higala nga si Padre Oliver Bolongon. Ug kun wala ko masayop duol ra gyud ang among panuigon. Wala pa kaabot og singkwenta.

Akong gipahibalo ang ubang mga classmate namo ning maong panghitabo aron makahalad og bisan pipila ka pudyot sa mga pag-ampo alang sa kapahulayang dayon sa iyang kalag. Ang kinabuhi sa tawo dili matag-an. Ang naandang pagsabot nga ang mga tiguwang ug edaran maoy unang kuhaon ang dili diay tinuod kay bisan gani batan-on mamahimong motaliwan na ning kalibutan.

Lesson learned ni alang natong tanan. Ang mahinungdanon mao nga:

1. Andam kita sa tanang panahon. Ang kamatayon moabot daw kawatan.

2. Atong atimanon ang atong lawas as if molungtad kini sa eternidad ug atong atimanon ang atong kalag as if mamatay kini ugma.

3. Mahinungdanon ang karon busa ayaw kini usiki.

4. Ayaw lamang palamboa ang patigayon sa mga butang ug bahandi, ayoha ang patigayon usab sa relasyon.

5.  Ang Ginoo maoy tinubdan sa Kinabuhi siya ra usab ang mobawi niini.

6. Ang kamatayon dili katapusan kondili sinugdanan sa kinabuhing walay katapusan.

7.  Ang Dios mohukom kanato dili sa paagi nga kita mamatay kondili sa paagi nga kita nisanong sa iyang gugma ngari kanato sa panahon nga kita buhi pa.

Kun asa ka man rong Byong, dili maguol. Sayud ko nga ang Dios dili mopuno sa imong gipangandoy. Dili ka na angayang magtigom pa tungod kay ang Dios mao naman ang imong Bahandi.