Sports gyud og kinaiya

Biliba nako ni Cebu City Mayor Raymond Alvin Garcia kay wa gyud siya magdugay-dugay sa pag-angkon og kapildehan sa miaging eleksyon.

Wa pa gani tungang gabii, nag-post na siya sa social media ug mipahalipay kang mayor-elect Nestor Archival nga maoy nakakuha og labaw’ng botos sa mga kandidato pagka mayor dinhi sa Cebu City.

Si Mayor Raymond nga buot unta magpasubli sa katungdanan ikaduha ra ni Archival, ug ang ikatulo mao si kanhi mayor Michael Rama, kinsa wa pa moangkon og kapildehan.

Gani, gimandoan dayon ni Mayor Raymond ang iyang city administrator nga si Atty. Kristine Batucan nga andamon dayon ang iyang mga sakop aron makigtagbo sa Transition Team sa bag-ong mayor.

Kabahin ni kanhi mayor Rama nga wa pa gyud moangkon og kapildehan, wa siya magtoo nga gitikasan sa nakadaog apan matud niya nga ang posibleng nagtikas niya mao ang Automated Counting Machines.

Para nako, mora’g dili tingali sab. Abi ninyo og ngano? Dili ra kay ang mga kandidato nga alyado ni Rama ang nangapilde, kondili, nangapilde sab ang mga kandidato sa han-ay ni Mayor Raymond.

 Sayonan ka nga ang akong amigo nga si Atty. Rey Gealon, Junjun Osmeña, James Cuenco, napilde man sab. Unya sa kampo ni Rama nangapilde sab sila si Atty. Joy Pesquera, Konsehal Noel Wenceslao nga mahulagway nga “banggiitang mga konsehal.”

Aw, ambot lang, basin og dunay bug-at nga basehanan si Rama sa iyang pag-ingon nga ang ACM maoy nanikas. Ako bitaw nahibung kaayo nga duna may mga kandidato nga dili ilado apan nanghawod sa botos.

Sa mga pulong-pulong dili kamao manulti, apan nakadaog man. Ako na lang awhagon sila si Rama ug Garcia nga mangandam lang sa ilang pagbalik paglansar karong 2028.

* * *

Kabahin ni mayor-elect Archival, ato siyang hatagan og dakong pagsalig nga molampos siya sa iyang tinguha nga mapalambo ang dakbayan sa Sugbo ubos sa iyang administrasyon.

Maayo unta og karong mayor na si Archival, dili mausab ang iyang batasan aron duol siya kanunay sa kasingkasing sa katawhan. Daghan man gud ang nakabantay nga di na kuno motubag og tawag si Archival human nga nakadaog.

Tungod sa mga nadawat nako nga inpormasyon, gisuwayan nako og text ug tawag ang bag-ong mayor, ug nakaingon ko nga mora’g tinuod da kay wa sab tuod ko niya tubaga.

Pero sagdi lang kay basin og “busy” ra mao nga dili niya matubag ang daghang tawag ug text. Basin og pareho ni kanhi mayor Edgardo Labella nga dihang wa kini motubag, dunay miingon nga nahambugero dayon siya. Diri nako si Labella nangatarungan nga busy tawon kuno siya kaayo ug dili na maato pagtubag ang daghang mga text.