Ang tinuod nga kumbati ini'g lingkod na ni gov-elect Baricuatro sa Kapitolyo

Karon pa lang hashasan na ni Cebu governor-elect Pamela Bricuatro kon kinsa ang haum ug angayan nga iyang mga ikauban sa pagdumala niya sa lalawigan sa Sugbo. Kadtong segurado siya nga iyang masaligan, kadtong dili lang adunay igong katakos nga moabag kaniya sa Kapitolyo sanglit dili basta basta nga mga pagsulay ang iyang agian.

Tinuod nabuak na niya ang hilabihan ka lig-on nga agianan pasulod sa Kapitolyo ug wala nay makababag sa iyang paglingkod ini'g abot sa udto sa Hunyo 30, 2025. Apan sinugdanan pa lang kini sa tinuod nga kumbati sa higayon nga makalingkod na siya sa katungdanan.

Dili sama sa naglakaw ra siya sa carpet nga puno sa gihay sa mga bulak kon dili daghan tunok ang iyang agian sa iyang pagpangatungdanan.

Busa usbon nako gikinahanglan niya og mga lig-on ug kasaligan nga mga tawo nga maoy mohawan sa mga tunok nga anaa sa dalan nga iyang paga agian. Napildi man niya sa eleksiyon si Governor Gwendolyn Garcia, apan dili ikalimod nga magpabilin ang iyang impluwensya sa lokal ug nasyonal nga kamada sa politika.

Dili nato mapadaplin ang posibilidad nga adunay mga lakang nga himoon sa mga kontra ni Baricuatro panahon sa iyang pagpangatungdanan. Gisugdan naman gani sa dihang nideklarar siya sa iyang kandidatora.

Ang tanan nga miyembro sa legislative kaabin ni Garcia, unsaon naman lang kong lisodlisoron nila ang mga programa sa Baricuatro administration tungod kay nagpabilin ang iyang simpatiya ug loyalty sa outgoing governor. Maisip lagi sila nga independete apan dili pud ikalimod ug tataw man kaayo nga nagpailawom sila gahum out going governor.

Dunay gipamulong si Baricuatro nga magpaubos siya sa paghangyo sa mga Provincial Board members nga makig-alayon sa iyang mga programa alang sa kaayohan sa katawhan sa laawigan sa Sugbo. Maayo unta kong malukmay ang kasingkasing nila nga mosanong sa hangyo sa governor-elect.

Hinuon nakita man sad sa mga sakop sa Provincial Board kon unsa ang mandato nga gihatag sa katawhan kang Baricuatro. Mokapin sa usa ka milyon ka botos ang nakuha niini ug kining gidaghanona maoy mosingil sa mga opisyal sa lalawigan nga makaingon nga dili na unya matuman ang mga programa alang sa katawhan tungod sa pamolitika.

Laing hagit nga labangon ni Baricuatro kong unsaon niya pagkuha ang suporta sa nasudnong kagamhanan. Dili ikalimod nga hilabihan ka suod  ni Garcia si President Ferdinand Marcos Jr. samtang si Baricuatro ang tinuboy sa mga Duterte. Busa dili nato mapadaplin ang posibilidad nga kon unsay nahiaguman sa mga local chief executives nga dili kaabin sa administrasyon. Sila nangasuspenso ug ang example niana si dismissed Mayor Mike Rama kinsa bukas kaayo misuporta sa mga Duterte, ang resulta nawagtang hinuon siya katungdanan.

Busa karon pa lang mag-amping ug dili mokumpiyansa si Baricuatro kon di kinsa ang mga tawo nga iyang saligan. Kay inay makatabang niya, magbutang na hinuon kaniya ug sa iyang administrasyon sa apike nga sitwasyon. Sama kang Mayor Rama nga sobra ka salig niya sa iyang mga tawo, ang resulta wala na siya kabalik sa city hall.

Daghan ra ba kaayo nangulitawo karon sa governor-elect kinsa nikalit na sa pagbutho dihang nakadaug na apan dihang wala pa ang uban kanila nisaway pa. Dihang nanginahanglan si Gov. Pam sa tabang, siya gikataw-an lang, karon nga nga gubernador na nabali naman ang hangin ug ang uban nagpaduding naman.