Nganong gidid-an man pagdangop sa Feng Shui?

Ang Feng Shui nagasukad pa sa karaang panahon didto sa China. Gitawag usab kini og Chinese Geomancy. Ang sukaranang pagtulon-an niini mao nga pagagamiton ang enerhiya nga anaa sa palibot aron ang tawo o kita mahimong uyon ug alayon niini sa tinguha nga makab-ot ang harmony. Ang Feng Shui sa pagsabot nga literal nagkahulogan man og wind water kun geomancy.

Pinaagi sa pag-arrange kun pagpahimutang sa mga butang sa palibot ang makahimo sa pagdapit og postibong enerhiya o dili ba kaha negatibong enerhiya. Kasagaran sa mga patigayon labina gyud kun insik ang tag-iya ang mokonsulta man sa mga feng shui master.

Usa kini dakong supak sa atong tinuhoan, sala batok sa relihiyon.

Kini tungod kay ang panalangin wala man magagikan diha sa mga enerhiya o sa paagi nga gihan-ay nato ang mga butang kondili gikan sa kahitas-an.

Ang Diosnong Pag-amoma (Divine Providence) mao man ang atong gisaligan diha sa atong kinabuhi. Ang kinabuhi nagasukad sa pagpili ug dili sa chance o fortune. Ang pagpili nagagikan man sa pagtuo nga ang Dios mohatag.

Dili dautan nga duna kitay pagtagad sa palibot ug kalikupan. Apan atong hinumdoman nga unta ang tanang paningkamot ug panlimbasog dili maayo nga iangkla sa bisan unsang energy vibrations.