May motor ka ba?

Mga tag-iya og motorsiklo, hatagi og gamay’ng panahon sa pagbasa niining akong lindog aron nga masayod mo sa bag-ong balaod nga gitawag og Motorcycle Crime Prevention Act.

Taudtaud na nga gihimo kining maong balaod, apan kaniadtong Mayo 9, 2025, gihimoan kini og kausaban pinaagi sa Republic Act 12209, nga mao ang naghimo’g kausaban sa Republic Act 11235.

Ang katuyoan gyud niining maong balaod aron nga kon ang usa ka motorsiklo gamiton sa paghimo’g krimen, dali ra kini nga mailhan sa kapolisan kinsa ang mga tag-iya.

Ang mga tigbaligya’g motor gimandoan nga kinahanglang sa dili pa molapas ang lima ka adlaw, iparehistro na nila sa Land Transportation Office ang motor nga napalit gikan kanila.

Sa samang higayon ang mga nakapalit og motor gikan sa mga dealers, gimandoan sab nga mo-report sa LTO sa dili gihapon molapas lima ka adlaw kon ilang ibaligya ang sakyanan aron dili sila pamultahon og P5,000.

Unya, kadtong makapalit sa motor, kinahanglan nga moadto sila sa LTO sa dili pa molapas ang 20 ka adlaw ug ipabalhin nila ngadto sa ilang ngalan ang tag-iya sa motor aron dili sila multahan og P5,000. 

Ang LTO gimandoan usab sa balaod nga sulod sa duha ka adlaw kinahanglang i-release nila dayon ang rehistro kon kompleto na ang mga gikinahanglang dukomento, apil ang clearance sa PNP Highway Patrol.

Kay duna man gyuy mga tag-iya’g motor nga dili makaimpas pagbayad, ang balaod naglatid sa mga motorcycle dealers nga mosumiter og report sa LTO sa mga “repossessed motorcycles,” ang multa niini P5,000.

Kadtong masakpan nga mag-drive og motor nga way plaka, o kaha dili mabasa ang plate numbers, multa gihapon P5,000. Pananglit mahulog ug mawala ang plaka, kinahanglang mo-report dayon mo sa LTO, P5,000 sab ang multa kon dili dayon i-report ang pagkawala sulod sa tulo ka adlaw.

Kadtong mogamit og mga plaka nga dili iya sa maong sakyanan, aw gamay ra og multa, P20,000 ra. Unya, kon i-tamper, usbon ang plaka o kaha tabonan sa tumong nga dili maklaro, aw priso ang silot niini, unom ka buwan ngadto sa duha ka tuig, unya may pakapin pa nga P10,000 nga multa.

Samtang ang kadagkoan sa LTO gimandoan nga kinahanglang sa dili pa molapas ang June 30, 2026, makahatag na gyud sila og mga plaka sa mga motor nga iparehistro.

Kon magpahimo og Temporary Plate, kinahanglang dako nga susama na sa bag-ong plaka nga makita o mabasa sa gilay-on nga 15 meters, kay kon dili gani susama sa original plate, multa gihapon.

Sunda gyud ninyo ang balaod kay para ra usab kini sa atong kaayohan.